ОБРАЗОВАНИЙ

Президентын премийжылан темленыт

Юлтехын Информатике ден вычислительный технике факультетшын 4-ше курсыштыжо тунемше Алексей Тоцкий студент-шамычын «Контроллер-влакын программированийышт»  всероссийский олимпиадыште сеҥышыш лектын. Тудым Россий президентын талантан самырык тукымлан полышым пуымо премийжылан темленыт.

Кумшо верым ты факультетынак магистратурыштыжо 2-шо курсышто тунемше Валерий Горохов налын. Тыгай олимпиаде элыштына икымше гана (кум тур) лийын. Кок этапше Интернет полшымо дене эртен. А пытартыш турым ПГТУ вашлийын. Финалыш Российын тӱрлӧ вузшо гыч 52 студент лектын.

Олимпиадын лектышыже

Школышто тунемше-влакын всероссийский олимпиадыштын регионысо этапше республикыштына 11 январь гыч 22 февраль марте эртен. 21 предмет дене уш-акылыштым 9-11 класслаште тунемше 761 еҥ да 8-ше классыште тунемше 53 ӱдыр-рвезе терген. Жюри чылаже 61 школ гыч 201 сеҥыше ден призерым палемден. Йошкар-Оласе школлаште тунемше 138 еҥ сеҥыше ден призер коклаште лийын.

Рӱдоласе 28-ше №-ан лицейын 29 тунемшыже кӱкшӧ шинчымашым ончыктен. Кокымшо верыште – Политехнический лицей-интернат (26 тунемше). Кумшо верыште – Бауман лицей (21 тунемше).

Селасе школла гыч Руэмысе шуко профилян лицей-интернат ойыртемалтын. Сеҥыше ден призер коклаште 7 ӱдыр-рвезе лийын.     

Республикысе олимпиадыште кӱлеш наре баллым погышо тунемше-шамыч Россий кӱкшытан олимпиадыш каят. Тудо 20 март гыч 30апрель марте эрта.

Чын возаш тунем

Апрель тӱҥалтыште Марий Элыште нылымше гана «Тотальный диктантым» возаш тӱҥалыт. Ты акций деч ончыч Марий кугыжаныш университет чын, йоҥылыш деч посна возаш туныктымо курсым эртара. Тудым «Тотальный диктант» акцийын координаторжо, филологий науко кандидат, доцент Сергей Журавлев вӱда. 

Занятий-влак 14 апрель марте кажне кугарнян МарГУ-н «Г» корпусыштыжо (Пушкин урем, 30-шо пӧрт)  18 шагатлан  лийыт. Пелен ручка ден тетрадьым налаш ида мондо.

Л.ШАБДАРОВА.

Опубликовать в Одноклассники