Параньга район Кугу Пумарий школышто верысе тоштерым ончал савырнаш кумыл лекте. Тыгак кидмастар-влак денат палыме лийым.
Эн ончыч «Самырык сӱретче» кружокын занятийышкыже пурышым. Тудым ешартыш образованийым пуышо Римма Калугина вуйлата. Классыште 2-шо, 4-ше класслаште тунемше йоча-влак шӱртӧ-график, кагаз-пластике технике дене радынаштым клеитлен шинчылтыт ыле. Очыни, 8 мартлан аваштлан пӧлекым ямдыленыт.
Ты кружокышкак коштшо 9-ше классыште тунемше Катя Михеева ыштыме пӧртшым ончыктыш. Ӱдыр пашажым Йошкар-Олаште эртыше «Дом моей мечты» конкурсышко намиен.
— Пумарий почиҥгаште илем. Ландшафт дизайнер специальностьым налнем.. Мыйын шонымаште, пӧрт макетемым ончен, чапле суртым чоҥаш лиеш. Тушто илаш моткоч йӧнан, — манеш ӱдыр.
Ты школым шуко талантан йоча тунем лектын. Нунын пашаштым школ пырдыжыште ужаш лиеш. Юлия Золотареван, Елена Волкован, Наташа Чиркован, Светлана Сергееван, Женя Николашкинан тӱрлымӧ ӱстембалшовычышт тоштерым сӧрастара.
— Таня Михеева моткоч устан сӱретлен. Кызыт тудо Йошкар-Оласе художественный училищыште икымше курсышто тунемеш, — палдарыш Римма Валентиновна.
Школ тоштерым Т. Чиркова вуйлата. Музейым 1980 ийыште почмо. Икымше экспонат-влакым тунемше-шамыч ден историй предметым туныктышо Владимир Александрович Глушков (кызыт сулен налме канышыште) погеныт. Тоштерыште верысе художник-влак Александр ден Евгений Глушковмытын сӱретышт аралалтыт.
Татьяна Николаевна школышто 25 ий пашам ышта. Технологий предметым туныкта да краеведений кружокым вӱда. Тудо Россий Федераций калык просвещенийын отличникше. 2009 ийыште 100 тӱжем грантым сеҥен налын
— Уроклаште да тудын деч варат йоча-влак дене марий тӱрым тӱрлена. Тыгак шовычым, аралтышым, курчак-влакым ыштена. 2010 ийыште Санкт-Петербургышто илыше марий-шамыч мыйым да марий сӱретче-влакым шкешт деке ӱжыныт ыле. Тушко мый Кугу Пумарий школышто тунемше йоча-влакын кидпашаштым намиенам, — манеш Т.Чиркова.
М.СКОБЕЛЕВ.
