Тиде ой Марий Элын Конгресс-влакын полатышкышт чумыргышо самырык тукымлан лач келшен толеш. 28 уста ӱдыр-рвезылан Россий президентын премийжым кучыктеныт. Нуно ӱмаште республикысе, Российысе олимпиадылаште, конкурслаште, соревнованийлаште сеҥышыш лектыныт але призер лийыныт.
Талантан самырык тукымлан полыш «Образований» национальный проект кышкарыште пуалтеш. Марий Элыште ты проект 2006 ий гыч пашам ышта. Ӱмаште ты наградым Марий Эл гыч 29 ӱдыр-рвезе налын. Чылаже Республикын уста ӱдыржӧ-влаклан федеральный бюджет гыч тений 1 миллионат 50 тӱжем теҥгем ойыреныт.
Ты кечын «Тый – амалкалче» федерал программыш ушнышо да Марий Элыште шке пашам почшо да устан виктарыше самырык бизнесмен-шамычланат дипломым да грантым кучыктеныт. 2016 ийыште изи бизнесым почшо-влак коклаште эртарыме конкурсышто сеҥыше шым амалкалчылан пашам умбакыжат виктараш 500 тӱжем теҥгем пуымо. Ты программе дене келшышын, вич ий жапыште изи бизнесыште 300 утла паша верым почыныт. Торжественный мероприятийыште ӱмаште кеҥежым йоча да самырык-влаклан финн-угор лагерьыште усталыкым ончыктышо вожатый-шамычымат палемденыт.
Награде-влакым Марий Эл Правительстве председательын икымше алмаштышыже, тӱвыра, печать да калык-влакын пашашт шотышто министр М.Васютин ден образований да науко министр Г.Швецова кучыктеныт.
Премийым налше-влак туныктышыштлан, тренерыштлан, ача-аваштлан таумутым ойленыт. Уна-влак моштымашыштым шке шинчашт денак ужын да колын кертыныт. Мутлан, Кужэҥер йоча искусство школын тунемшыже, калык семӱзгар дене шоктымо республикысе конкурсын лауреатше Константин Шарнин баян дене туге устан шокталтен пуэн, эсогыл залыште шинчыше-шамыч тудлан совым ятыр жап кыреныт. Национальный президент искусство школын тунемшыже Елена Злобинат усталыкшым ончыктен. Тудо домр дене весела семым шокталтен.
Каласыман, ятырын наградым налаш толын кертын огытыл (ача-аваштлан кучыктеныт), молан манаш гын нуно Российысе вузлаштыже тунемыт, республикнан чапшым Россий кӱкшытан соревнованийше аралат. Тидыжак республикысе самырык тукымнан кӱкшӧ шинчымашым налмыжым да вес регионлаште илыше ӱдыр-рвезе-шамыч дене иктӧр ошкылмыштым ончыкта.
— Россий президентын премийже мылам моткоч шерге. Тугеже тыршымем арам лийын огыл. «Самырык талант-влак» республикысе конкурсышто сеҥышыш лекмемлан туныктышем Валентина Сергееевна Виноградовалан тауштем. Тыгай кӱкшытыш шумыштем ача-авамынат надырышт кугу, — каласен Е.Злобина.
Л.ШАБДАРОВА.
Снимкыште: Марий Элын уста да талантан самырык тукымжо.
