4-5 ноябрьыште Национальный президент школ-интернатыште «Ума палата» уш-акылым вияҥдыше модмашын окружной финалже эртен. Марий Элыш Юл кундем федерал округын 14 регионжо гыч команде-влак чумыргеныт. Ты мероприятий тулык да ача-аван полышыж деч посна кодшо икшыве-влаклан кумылаҥдаш эртаралтеш. Тудо «Йоча пагытым пӧртылташ» проект, Юл кундемысе федерал округышто Россий президентын полномочный представительже М.Бабичын полшымышт дене илышыш шыҥдаралтеш.
Финалыш логалшаш верч ӱдыр-рвезе-шамыч шке кундемыштышт сеҥышыш лектыныт. А Йошкар-Олаште команде-влак «Мо? Кушто? Кунам?», «Своя игра» модыш сынан викторинылаште уш-акылыштым тергеныт. Йодыш-влак тӱрлӧ сынан, оҥай, ӧрыктарыше лийыныт. Чын вашешташ чынжымак шуко мом палаш кӱлын. Капитан-влак коклаштат эн ушаным ойыреныт.
Ӱдыр-рвезе-влакым поян тӱвыра программат вучен. Уш-акыл тодыш деч вара нуно Йошкар-Олам ончал савырненыт, кинотеатрышкат миен коштыныт. А Марий кугыжаныш университетын студентше-шамыч школ-интернатын фойештыже нунылан «Мемнан Марий кундемна» выставкым ямдыленыт. Тыгак уна-шамыч поян концерт программым онченыт, шкешотан квест-модышышто таҥасеныт, тылеч посна тӱрлӧ модыш денат модыныт. Ӱшанена, йоча-шамыч Марий Эл нерген эше ятыр жап порын шарнаш тӱҥалыт.
Жюри сеҥыше-влакым 5 ноябрьыште палемден. Кумшо верым Мордовийын, кокымшо верым Татарстанын командышт налыныт. А икымше вер дене Киров областьын ӱдыр-рвезыже-шамыч палемдалтыныт. Нуно модышын куснылшо кубокшым, пу гыч пӱчкеден лукмо тумнам, мӧҥгышт наҥгеныт.
Л.ШАБДАРОВА.
М.Скобелевын фотожо.
