Марий Элын Тӱвыра, печать да калык-влакын пашашт шотышто министерствын конференц-залыштыже «Марийцы Карелии» Карелийысе региональный мер организацийым вуйлатыше Михаил Асессоровын «Линия жизни. Жизненный путь человека из поколения победителей» книга презентацийже эртен.
Михаил Алексеевич Курыкмарий районын эргыже, Кугу Отечественный сарын участникше Георгий Сергеевич Синицинын илыш корныжым шымлен, но автор Г.Синициным палыше еҥ-влак деч, тыгак сар жапым ача-ава ден коча-ков-влакын каласкалымыштым возен кодышо-шамыч деч полышым йодеш, молан манаш гын книгам ешарен, уэмден савыкташ шонымашыже уло.
Презентацийыште Георгий Синицин нерген изирак фильмым ончыктеныт. Тылеч посна Михаил Алексеевич Карелийыште илыше марий-влакын мер организацийыштын пашаж денат палдарен. Тений ноябрьыште «Марий-влак — Карелийын каваж йымалне» фестиваль лиеш. Пайрем «Акрет мари» фольклор ансамбльын 10 ияш лӱмгечыжлан пӧлеклалтеш. Тушто мастарлыкым Марий Эл Кужэҥер район гыч «Мурсескем» ансамбльат ончыкташ тӱҥалеш.
Михаил Асессоров Медведево районысо кок книгагудылан Карел кундемысе автор-влакын книгаштым пӧлеклен. Районысо администраций вуйлатышын социальный йодыш шотышто алмаштышыже Н.Шалагин ден Марий Элын тӱвыра, печать да калык-влакын пашашт шотышто министерствын калык да конфессий-влак кокласе кыл шотышто отделжым вуйлатыше И.Садовин М.Асессоровлан тыгак вашеш пӧлекым ыштеныт.
Л.ШАБДАРОВА.
