26 октябрьыште Йошкар-Оласе Самырык-влакын полатыштышт икмыняр пайрем эртен. Тушто Объединенный Араб Эмиратыште, Абу-Даби олаште, паша профессий-влакын «WorldSkills International – 2017» тӱнямбал чемпионатыштыже ойыртемалтше марий рвезе Павел Казанцевым саламленыт, Марий Эл Главан стипендиатше-шамычым палемденыт, шукерте огыл Сочи олаште лийше Самырык ден студент-влакын тӱнямбал фестивальышт гыч пӧртылшӧ ӱдыр-рвезе-влакым шокшын вашлийыныт, тений ссузлаш тунемаш пурышо-влакым икымше курсыш пуртымо мероприятийым эртареныт.
Самырык-влакын полатыште икмыняр площадке пашам ыштен. Марий Элым вуйлатыше да правительстве член-влак кундемнан патриотический клуб, стройотряд, волонтёр-влакын пашашт дене палыме лийыныт. Александр Александрович кажне площадке воктене шогалын, ӱдыр-рвезе-шамыч дене порын мутланен, пырля войзалтын.
Торжественный ужашыште Марий Эл Республикым вуйлатыше А.Евстифеев Павел Казанцевым шокшын саламлен, варажым стипендиат-влакым палемден. Марий Эл Правительстве председательын икымше алмаштышыже С.Сметанин строительный техникумын тунемшыже Павел Виноградовлан «Самырык профессионал-влак-2017» национальный чемпионатын финалыштыже «Плиткым оптымаш» номинацийыште кумшо верым налмыжлан да тудын туныктышыжо Марина Храмовалан Марий Эл Главан грантшым кучыктен.
Варажым Марий Элын 19 ссузыштыжо икымше курсышто тунемше 4129 ӱдыр-рвезым первокурсник радамыш пуртеныт. Пайрем весела концерт программе дене мучашлалтын.
Л.ШАБДАРОВА.
М.Скобелевын фотожо.
