ЯЛОЗАНЛЫК

Лийын мом ончаш, лийын мом тамлаш

Кодшо кугарнян, 20 октябрьыште, Г. Константинов лӱмеш академический руш драме театр, чынжымак, мӱкш омартала гӱжлыш. Вет тиде кечын республикнан чыла районжо гыч ялозанлык пашаеҥ, ветеран-влак тӱҥ пайремыштым палемдаш погыненыт. Чылаштын чурийыште куан шӱлыш шижалтын. 

Фойеште толшо-влакын кумылыштым Советский районысо Кельмаксола тӱвыра пӧртын фольклор коллективше весела мурыжо, куштымашыже дене нӧлталын. Ончычсо ийласе семынак перерабатыватлыше предприятий, тӱшка озанлык-влак шке сатуштым ончыкташ конденыт. Кочкыш сатум ужаш веле огыл, тамлен ончашат йӧн лийын. Предприятий-влакын марий вургемым чийыше еҥышт калыклан чылажымат кумылын темленыт. Шыл, шӧр гыч ямдылыме тӱрлӧ кочкыш-йӱыш, поҥго, мороженый, мӱй, вуйдеҥге чай, салмаш жаритыме пулдырчо муно, кинде, булко, торт да молат, манмыла, шӱвылвӱдым луктыныт. А предприятийна-влаклан уло мом ончыкташ да мо дене кугешнаш. Вет арам огыл октябрь тӱҥалтыште Москваште эртыше «Шӧртньӧ шыже – 2017» Всероссийский ялозанлык выставкышке мемнан республик гыч мийыше коло вич предприятий нылле ныл медальым конден. Але марте ик ганат тыгай кӱкшытыш шумо огыл ыле. Нине медальым пайремыш кондымо выставкыштат ужаш лийын.

 

Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.

В.Смоленцев.

Опубликовать в Одноклассники

Добавить комментарий