Тазалыкым аралыме министерствыште тӱҥ врачын кечыже эртен. Совещанийыште Йошкар-Оласе йоча эмлымверын тӱҥ врачшым алмаштыше Ю.Зейтулаева инвалид йоча-влакым обслуживатлыме да реабилитироватлыме нерген каласкален.
Тудын палемдымыж почеш, 2016 ийыште Марий Элыште 54857 инвалид йоча лийын, тидыже 2010 ий деч 25 процентлан шукырак. Начар тазалыкан 929 икшыве ешыште ила. 93 процент йочам ий еда амбулаторийыште, 45 процент икшывым стационарыште эмлат, кӱкшӧ технологичный медицине полышым 5-6 процент инвалидлан пуат, 2,5 процент черлым республик деч ӧрдыжсӧ специализироватлыме тӧнежлашке колтат. Кодшо ийын 18 йочан инвалидностьшым кораҥдыме, молан манаш гын чыланат тичмаш реабилитацийым эртеныт. Инвалидизацийын показательжым таза илыш йӱлам кучаш полшышо мероприятийым эртарыме, патологийым жапыштыже диагностироватлыме, кӱкшӧ технологический медицине полышым пуымо, реабилитаций да паллиативный полышым вияҥдыме дене саемдыме.
Республикысе онкодиспансерын тӱҥ врачше Е.Яковлева первичный онкологий кабинет-влакын пашашт дене палдарен. Таче кечылан Марий Элыште 20 тыгай кабинет уло. Нунын пашашт лачшымак нине кабинетыште пален налаш лийме ракын визуальный формыжлан тӱткышым ойыраш кӱлмым рашемден.
Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.
М.ИВАНОВА.
