Морко район Нурӱмбал кыдалаш школышто тӱрлӧ калыкын икшывышт тунемыт. Нунын коклаште ик украинке, кок узбек, татар, марий, руш ӱдыр-рвезе-влак улыт.
— Тӱрлӧ калык гыч улыт гынат, чыланат марла мутланат. Школышкына воктенсе ялла гыч да торасе Петровский села гыч йоча-влак коштыт. Ме «Российын школжо» программе почеш туныктена. Ты школым Марий Элыште кумдан палыме ятыр лӱмлӧ еҥ тунемын лектын: Марий телевиденийын дикторжо Роза Рябцева, Шкетан лӱмеш драмтеатрын артистше-влак Юрий Алексеев, Иван Николаев, эмлызе Юрий Петров, шанчызе Гурий Лаврентьев да молат. Отличникна, 9-ше класс гыч Гульназ Хасанова,журналист лийнеже, районысо олимпиадылаште, конкурслаште вийжым терга. Ты класс гычак Даша Константинова сайын тунемаш тырша. Тудо историй ден литературым йӧрата. Тений Диана Тихонова 11-ше классым сайын тунем пытарыш, юристлан тунемаш пурен, — палдарыш школ директорын алмаштышыже Римма Иосифовна Михайлова.
Кумданрак — «Марий Эл» газетын
2017 ий 24 октябрьыште лекше номерыштыже лудын кертыда.
М.СКОБЕЛЕВ.
Авторын фотожо.