КУЧЕМЫШТЕ

«Куатле илыш тамым паленам»

Лач тыгай лӱман шарнымаш касым 21 октябрьыште Кужэҥер районысо Старсела ял калык да уна-влак Марий Элын Калык писательже Зинаида Каткован шочмыжлан 95 ий темме лӱмеш эртареныт. 

«Саскавий» ӱдырамаш ушем вуйверын еҥже А.Эманован палемдымыж почеш, «Кушто улат, пиалем?», «От себя не уйдёшь» да моло книга-шамычын авторжылан пӧлеклалтше мероприятийым эртараш верысе чолга еҥ-влак уло чоныштым пыштенак ямдылалтыныт. Районысо библиотекылаште тыршыше пашаеҥ-влак коклаште эн сай сценарийлан конкурсым увертареныт. Касым Кужэҥер кундемысе библиотеке системын методистше Л.Осинина мастарын вӱден. Пагалыме писательын произведенийже негызеш тудо да тудлан полшышо еҥ-влак погынышо калыклан Зинаида Каткова нерген сӱрет да фото-шамыч гоч кумдан каласкаленыт.
Шарнымаш касыш марий калыкын йӧратыме мурызыжо Т.Денисова, Кужэҥеркундемыштешочын-кушшо поэт-влак А.Иванова ден Г.Сабанцев, тыгак «Саскавий» ӱдырамаш ушемын К-влак миеныт. Погынышо калыклан тыгак шке шарнымашыж дене писа тельын Мавра йолташ ӱдыржын ӱдыржӧ палдарен. Моторын ямдылыме сценыште шке мастарлыкыштым «Тымык кас» верысе фольклор ансамбльын участникше-влак, Старсела клубым вуйлатыше А.Таныгина ончыктеныт.

Шарнымаш касыште шочмо вер-шӧр, шочмо йылме нерген мутланымаш тарваныде кертын огыл. Тыгай «йыргешке ӱстел» йыр кажныже шке шонымашыжым каласен. Шочмо йылмына нерген Коҥганур школын туныктышыжо Э.Рыбакова, у марла книга шагал толмо нерген Старселасе библиотекарь С.Носова поснак тургыжланен ойленыт. Зинаида Каткова шкеже ятыр ий ӧрдыж кундемыште, Старселан руш уремыштыже илен гынат, произведений-влакым яндар марий йылме дене возен коден, сандене тудын деч примерым налман.

Г.Кожевникова.
А.Эманован фотожо.

Опубликовать в Одноклассники

Добавить комментарий