Кодшо кечылаште Советский районысо рӱдӧ эмлымверыш «Ялысе доктор» программе дене акушер-гинеколог пашам ышташ толын. Тидын дене келшышын, специалистлан ик миллион теҥге кугыт компенсацийым пуаш ойпидышым ыштыме. Тиде – 2017 ийыште «Ялысе доктор» программе дене ялыш пашам ышташ кайыше визымше специалист.
Шошым ик миллион теҥге кугыт компенсацийым Звенигово районысо Суслоҥгер врач амбулаторийыш пашам ышташ толшо врач-терапевт налын. Шыжым Юрино районысо рӱдӧ эмлымверын врач-педиатрже, Шернур районысо рӱдӧ эмлымверын кардиологшо да Параньга районысо рӱдӧ эмлымверын хирургшо ялысе «миллионер» лийыныт.
«Ялысе доктор» программын пашам ышташ тӱҥалмыж деч вара республикнан тӱрлӧ луклашкыже 68 специалист пашам ышташ каен. Кажныже ик миллион теҥге кугыт компенсацийым налын.
2018 ийыште «Ялысе фельдшер» программе илышыш пурышаш. Тудын дене келшышын, ялысе фельдшер-акушер пунктлашке фельдшерлан пашам ышташ кайыше-влаклан 500 тӱжем теҥге кугыт компенсацийым ойырат.
М.ИВАНОВА.
