КУЛЬТУР ДА ИСКУССТВО

Самырык пагытым шарналтышт кова-влак

6 мартыште марий ӱдырамаш-влакын «Саскавий» мер ушемышт «Весела кова-влак» конкурсым Марий сийгудышто эртарен.

Тушко поэтессе, Марий Эл тӱвыран сулло пашаеҥже Мардан Рая (Раисия Николаева), «Марий памаш» ансамбльым вуйлатыше, Марий Эл тӱвыран сулло пашаеҥже Мария Соловьёва, Марий тӱвыра рӱдер пеленсе «У муро» авторский муро клубын участницыже Ольга Якимова,  Марий Турек районысо Акпатыр ял гыч сулен налме канышыште улшо Римма Смирнова, Кужэҥер районысо  Кугу Лаждӱр ял гыч сулен налме канышыште улшо Елизавета Волкова ушненыт.

Кова-влак шкешт дене кӱчыкын палдарымеке, ыштен кондымо кочкышышт нерген каласкаленыт. Могай гына тутло сий дене ӱстембалым темен огытыл?! Мелна, палыш, кыстывий, торык, полан кӧрган когыльо, уржа ложаш дене ыштыме полан лапаш да молат тамлын ӱпшалтыныт. Эсогыл Акпатыр памаш вӱдымат подылын ончаш йӧн лийын.

— Кочамат поҥгым погаш пеш йӧратен. Мыят тудын пелен шуко гына миенам да кызытат уло кумылын чодыраш коштам, — палемден Мария Лазаревна. — Кочамын рецептше почеш ямдылыме поҥго чылалан пеш келша.

Уш-акылым тергыме, сцене дене ошкылын, ӱдыр уныкан вуйышкыжо бантым ыштен моштымым ончыктышо конкурс-влакат оҥай улыт ыле. Кажныже шкенжын эн-эн улмыжым ончыкташ тыршен.

Кова-влаклан мӧҥгысӧ пашамат пуымо улмаш. Чылан гаяк мураш кумылан лийыныт.

— Муро ик жаплан самырык пагытыш пӧртылта, кумылым нӧлта, — палемдышт конкурсант-влак.

Раисия Николаеван тошто годсо да кызытсе жаплан келшыше телевизор нерген ямдылыме мыскаражат воштылаш таратен.

Жюрин аклымыж почеш, кова-влак тыгай лӱм дене палемдалтыныт:

— «Мудреч кова» — Мардан Рая;

— «Эн сай кова» — Ольга Якимова;

— «Эн мастар кова» — Мария Соловьёва;

— «Эн мотор вургеман кова» — Елизавета Волкова;

— «Супер кова» — Римма Смирнова.

Пайрем касыште Марий тӱвыра рӱдер пеленсе «У муро» клуб сылне мурыж дене кумылым нӧлтен. 

Участник-влак кажне конкурсышто мастарлыкым, чулымлыкым веле огыл, чоялыкымат ончыктеныт, мыскарамат кучылтыныт. Ийгот дене ончымаште чыланат кова улыт гынат, чонышт тугаяк самырык, чолга да весела.

Алевтина Байкова.

М.Скобелевын фотожо.

Опубликовать в Одноклассники