УВЕР ЙОГЫН

Шыже призыв – 2017: Салтак радамыш шогалыт

Шыже призыв теният 1 октябрь гыч декабрь мучаш марте шуйна. Ты гана республике гыч салтак радамыш 800 самырык еҥ (18-27 ияш-влак) шогалшаш.

Республикын военный комиссарже С.Сидоркинын палемдымыж почеш, тидыже ончычсо ий деч изишлан шагалрак. Ик семынже тудо демографийын начарештмыж дене кылдалтын, а вес велым – рвезе-влакын контракт службылан кумылаҥмышт дене. Ончыч кӱшыл шинчымаш нерген дипломан рекрут тыглай салтак семын латкок тылзылан стройыш шогалаш але кок ийлан контрактник лияш – шке ойырен налын гын, шошо призыв гыч Кугыжаныш Думын закон проектым приниматлымыж деч вара кыдалаш профессионал образованиян самырык еҥ-влакат тыгай йӧн дене пайдаланен кертыт.

Тиде гана 35 процент призывник Эрвел военный округышто служитлаш тӱҥалеш. Палемдыме верыш миен шуашлан кужу корным эртыше-влакым поездысе вагон-рестораныште сийлат. Рӱдӧ округыш 9 процент, молышт Кечывалвел да Касвел округлашке логалшаш улыт. Шукышт салтак илышым сухопутный войскаште «тамлаш» тӱҥалыт. Крымыш колтышаш нерген кызытеш огыт ойло. Теҥыз флотыш, юж десант да юж-космический войскалашке рвезе-влакым шагалрак налыт. Тушко тӱҥ шотышто контрактник-влакым колтат.

Альтернативный службым ты гана кум еҥ эрта. Мутат уке, могай войскаш логалме шотышто призывник медицине тергымашым эрышаш.

Шыже призыв дене кылдалтше пресс-конференцийыште республикын военный комиссарже Сергей Михайлович самырык еҥ-влакын тазалыкышт начарештмымат палемдыш. Но тыгодым лишыл регионла дене таҥастарымаште Марий Элыште тазарак улыт манын ойлыш. Тидыже, мутат уке, сай экологий, вер-шӧр, самырык тукымын таза илыш-йӱла дене пеҥгыде кылым кучымыж дене кылдалтын.

Чер-влак кокла гыч икымше верым психический лушкыдылык налеш.
Кокымшо верыште – лу да чогашыл дене кылдалтше чер. Ончыч самырык еҥ-влак тазарак лийыныт гын, тидын шотышто таче кечылан Юрино, Килемар, Курыкмарий районлаште ойыртемалтыт.

Мо уэмын? Тиде шыже тургымышто призывник-влаклан посна персональный картым (тушто айдеме нерген ятыр увер лиеш) пуат. Тудыжо службо деч варат кӱлеш лиеш. Тылеч посна «Мир» банке картым кучыктат. Тушко салтаклан кажне тылзын кок тӱжем теҥгем пыштат.
Икымше тӱшка призывникым службым эртыме верышке 19 октябрьыште колтат.

Е.Эшкинина.

Опубликовать в Одноклассники

Добавить комментарий