СОЦИАЛЬНЫЙ ИЛЫШ

Эн тӱҥ паша – лӱдыкшыдымылыкым эскерымаш

Росгвардийын Марий Элысе отделыштыже 14 мартыште пресс-конференций эртыш. Тудо Россий Федерацийын национальный гвардийжын войскаже-влакын кечыштлан пӧлеклалтын ыле.

 Марий Элысе отдел начальник полиций полковник Александр Бурдо, тудын алмаштышыже, штаб начальник подполковник Александр Золотов ла лицензионно-разрешительный паша рӱдер начальник Виктор Шуралёв журналист-влаклан Российыште национальный гвардий войска-влакым ыштыме историй, у ведомствын структуржо да задачыже, паша лектышыж нерген каласкаленыт.

Александр Бурдо палемдыш: Россий Федерацийын национальный гвардий войскаже-влак кугыжаныш да общественный лӱдыкшыдымылыкым эскерыше кугыжаныш военный организаций улыт.

Нине войска-влакым ыштыме историй нерген ойлаш гын, тудо княжеский Русь гычак тӱҥалтышым налеш. Тунам эл кӧргӧ лӱдыкшыдымылыкым княжеский дружинник, вара лӱйкалыше, эше варарак Пётр I-ын чумырымо регулярный армейский формирований-влак эскереныт.

1811 ий 27 мартыште император Александр I-ше Россий империйыште правопорядкым аралыше чыла часть-влакым чумыраш да кӧргӧ страж ик  корпусым ышташ кӱштен. А тылеч вара Российыште ВЧК, НКВД, ГПУ, МВД-н внутренний войскаже-влак лийыныт да улыт.

РФ национальный гвардий войска-влак федеральный службым ыштыме нерген указым Россий президент 2016 ий 5 апрельыште подписатлен. Ончыч, мутлан, ОМОН, СОБР, вневедомственный охране, икмыняр моло подразделений МВД-н структурышкыжо пуреныт гын, ынде нуно, тыгак авиаций да теҥыз формирований, тӱрлӧ назначениян часть-влак Россий Федерацийын национальный гвардий войскалашкыже ушалтыныт.

Кызыт Росгвардийым чумырымо паша кая. Тудо кум йыжыҥлан шелалтын. Икымше этап 2016 ий марте шуйнен. Тунам тӱҥ шотышто кадр, личный состав дене кылдалтше йодыш-влак рашемдалтыныт.  

Кокымшо этап тений 1 август марте кая. Тиде жапыште федеральный законодательстве дене келшышын нормативно-правовой базе шотыш кондалтеш, шындыме задаче-влакым шуктымо порядке ден кугыт палемдалтыт.

Кумшо этап 2017 ий 1 август гыч 2018 ий 1 январь марте шуйна. Тунам Росгвардийым формироватлыме паша тӱрыс мучашлалтшаш.

Тудо кызыт чыла шотыштат шотыш веле кондалтеш гынат, паша ышталтеш да лектышыжат уло. Росгвардийын пашаеҥже-влак преступленийым, административный правонарушенийым ыштыше-влакым кучат, саркурал ден боеприпасым, наркотикым аралымым рашемдат да поген налыт, моло кӱлешан пашам шуктат.

Л.Камалетдинова.

Опубликовать в Одноклассники