Россий регион-влакын рӱдолаштын представительышт ола-влакым вияҥдыме перспективе ден нелылык-влак нерген мутланаш чумыргеныт. Тиде шонымаш дене Муниципальный образований-влакын общественный конгрессышт пелен Российысе кугу ола-влакын палатыштым ыштеныт. Тудын икымше заседанийже кодшо кечылаште Кугыжаныш Думышто Конгресс президент Виктор Кидяевын вуйлатымыж почеш эртен.
Заседанийын участникше-влак кундемым тӱзатыме шотышто федеральный программым шуктымо опытышт дене палдареныт. Тений тушко Йошкар-Ола пурен. Марий Элысе рӱдола деч делегат Оласе депутат-влак собраний председатель Александр Принцев лийын.
«Кызыт элын правительствыже «Городская среда» проектым приниматла. Тушко Йошкар-Ола ушна. Проект оласе кудывече-влакым да общественный верым тӱзаташ шонымаш дене ышталтын», — ойлен тудо.
Палемдыме почеш, федеральный программыш логалшашлан Йошкар-Олаште илыше-влаклан чотак тыршыман. Тидлан кудывече-влакым тӱзатышашлан посна конкурс-влак увертаралтыт. Тыгак рӱдолаште илыше-влак Тазалык аллейым тӱзатышаш верч йӱкленыт.
Программе вич ийлан палемдалтын. Кызыт конкурсыш лу кудывече ушнен. Нуным тений у положений дене келшышын шотыш кондат. Шошо вашеш тиде паша мучашлалтшаш.
Л.Камалетдинова.
