ЭКОЛОГИЙ

Марий Элын сылне верже: Тушто кугу ава маска веле огыл ила…

Вес ийын икымше пелийжылан «Марий Эл» газетлан подпискым ыштыше-влаклан ме сай пӧлек-влакым ямдыленна. Иктыжым модын налшылан  Оршанке районысо «Большая медведица» каныме базыште еш але йолташ-влак дене ик сутка канаш йӧн лиеш. Таче ме ты базе да тудын вуйлатышыже Григорий Тихонов дене кумданрак палдарена. Кодшо кугарнян ме редакцийын коллективше дене тушто шкежат лийынна. 

Базе Кӧрдӧ ялыште верланен. Шкенжын сайтыштыже ончыктымо почеш, каныме базе пеш сылне, экологий могырым яндар, шып кундемыште  верланен. Йошкар-Ола гыч Оршанке тракт дене кайымаште 25 километр ӧрдыжтырак шинча. Йырымваш ужар олык, мотор куэр, вис-вис дене темше пасу, изи эҥер… Икманаш, ялысе пӱртус.Чылажат чоныш ласкалыкым пурта. А тидыже канаш толшылан эре кӱлеш.

Каныме базышке миен пуретат, шинчаш вигак пушеҥге укшла гыч ыштыме я модыш пӧрт, я модыш кӱвар, шинчын каналташ лӱҥгалтыш-влак логалыт.  Лывырге куэ-влак укшлаштым рӱзалтен шогат. Канаш толшо-влаклан пу пӧрт-влакым нӧлтен шындыме. Тушто илаш, каналташ  тӱрлӧ йӧн уло. Йолташ, лишыл еҥ-влак дене жапым тӱшкан эртараш беседкым келыштарыме. Тушто коҥгам олташ лиеш, кочкышым ямдылаш, шылым кӱкташ, кугу ӱстел йыр погынен шинчаш  йӧн уло. Вӱд воктене, тошкалтыш дене волен, каналтен шинчаш, колым кучаш верым  келыштарыме. Тыштак верандан изирак мончаш, тыгак вес вере финн сауныш пураш лиеш. Тӱрлӧ модыш дене модаш йӧн ышталтын, тидлан кумдыкшат ситышын. Тыгак базыште маскам, нергым, ирсӧснам, шорыкым ужаш лиеш. Нуным чылаштым посна-посна ашнат.

Кумданрак — «Марий Эл» газетын
2017 ий 30 сентябрьыште лекше номерыштыже лудын кертыда.

 

Светлана Носова.
М.Скобелевын фотожо.

Опубликовать в Одноклассники

Добавить комментарий