СПОРТ

Онар тукым: «Икшывына-влак пиалан лийышт, сай кӱкшытыш шуышт»

манеш Провой кундемысе Чакмарий села гыч ече дене СССР-ын спорт мастерже, поликлиникыште тыршыше, эмлыме физкультурым эртарыше Л.Белкина. 

Людмила Ивановна – кеҥеж биатлон дене тӱнямбал спорт мастер-влак Татьяна ден Надеждан авашт. Жапше годым тудо шкежат тале ечызе лийын.

Шукерте огыл Провой кундемыш миенна, Белкинмыт еш  дене палыме лийынна. Рончалтше мундырана тыгай савыртышым нале.

– Жап эртыме семын чылажат мондалтеш, шеҥгелан кодеш. Но школ, студент жап садак ик эн шарнымашан пагыт семын шарналтеш. Людмила Ивановна, Те тиде сылне жапым спортлан пӧлекленда?

– Такшым мый изинекак таза илыш-йӱлан ӱшанле йолташыже  улам. Школышто моло шуко йоча семынак спортын тӱрлӧ видше дене пеҥгыде кылым кученам. Ялыште вес семынже огешат лий, шонем. Ече секцийыш класс гыч визытын возалтынна. Мыланем ты вид келшен. Варажым, школым тунемын пытармеке, «Спартак», «Урожай» спорт клублаште куржталынам. Лийын, утыждене ямдылалтын, нелытым чытен, жаплан ечым шуэнам. «Ече» мутым колмеке, ик жап эсогыл укшинчыкта ыле.

– Школ деч вара пединститутыш тунемаш пуренда?

– Уке. Кокытеланенам. СПТУ-шко тунемаш пуренам, водительлан. Туштат ече дене куржталынам, тале спортсмен семын ойыртемалтынам. Тылеч вара тренер пединститутыш, спортфакыш тунемаш каяш темлен. Ныл ий (1980-1984) шижде эртен. Тиде жапыште факультетын чапшым араленам, кӱкшӧ результатым ончыктенам. Тунам пеш тале ечызе-шамыч дене пырля тренироватлалташ логалын.

Кумданрак — «Марий Эл» газетын
2017 ий 30 сентябрьыште лекше номерыштыже лудын кертыда.

 

Е.Эшкинина.

Опубликовать в Одноклассники

Добавить комментарий