Кодшо кугарнян Пензыште Россий президентын Юл кундем федерал округышто полномочный представительже Михаил Бабичын вуйлатымыж почеш округын советшын заседанийже эртен. Тушто Марий Эл Республикым вуйлатыше Александр Евстифеев лийын.
Погынышо-влак округысо регион-влакын экономикышт кушмым эшеат вияҥдыме, налог пурымым кугемдыме да бюджет-влак кокласе кылым уэмдыме йодышым каҥашеныт. Советын пашаче группыжым вуйлатыше, Пенза областьын губернаторжо Иван Белозерцев палемден: валовой региональный продукт (ВРП) кушмо писылык дене Юл кундем федеральный округ пытартыш кум ийыште Кечывалвел ден Йӱдвел Кавказ округла деч вара кумшо верыште кая. 2015 ийыште чумыр ВРП кугыт 9,9 трлн. теҥгеш шуын. Эн кугу кушмо темп Марий Эл ден Мордва республиклаште, Пенза областьыште палдырнен. Ик еҥлан шотлымаште ВРП-ын кугытшо дене Татарстан, Пермь край, Оренбург ден Самара область-влак ончылно улыт.
А.АНДРЕЕВ
