«Марий Элыште лӱштымӧ вольыкым ончен куштымо пашам вияҥдымаш» эн ончыч шуктышаш проект дене келшышын, «Звениговский» СПК шӧр комплексым чоҥаш тӱҥалын.
Тудо Морко район Октябрьский поселко деч тораште огыл верлана. Иктат пеле-кок ий гыч тысе чара пасушто кугу ялозанлык комплекс нӧлталтшаш. Тудо кум тӱжем вуй ушкалым ончаш келыштаралтеш.
Проект илышыш вич йыжыҥ дене шыҥдаралтеш. Тиде кечылаште 600 вуй лӱштымӧ вольыкым шогалташ икымше черетын негызшым ышташ тӱҥалыныт. Озанлык чумыржо ты пашаш 250 миллион теҥге инвестицийым пышташ палемда.
— Тыгай кугу да кумда проектым илышыш пуртышашлан ме ты программыште пашам ышташ шонышо да ыштен кертше шуко моло предприятийым ушышо пашаче группым чумырен шуктенна, — рашемда Марий Элын ялозанлык да продовольствий министрже Юрий Сидыганов. – Тыгак ты группыш проектым илышыш пуртымо дене кылдалтше чыла ведомство гыч специалист-влак ушнат.
А.АНДРЕЕВ.
