Марий вургемым чийыше ӱдыр-рвезе-влакын сылне марий сем почеш тавалтымыштым кажныже куанен онча, а чонышто тыгодым кугешнымаш кумыл шочеш. Кушкын толшо тукымым изинек шочмо калыкын сылнысемжылан, мурыжлан да куштымышыжлан шӱмаҥдымаш пашам Раисия Иванова шукта.
Кушташ изиж годымак шӱмаҥын
Раисия Алексеевна Морко районысо Эҥерсола ялеш шочын-кушкын. Изинекак мураш-кушташ йӧратен. Сандене аваже, акаже, изаже семын «Муро сем» фольклор да этнографий ансамбльыш коштын. Тунам ты коллективым Марий Эл культурын сулло пашаеҥже Петр Павлович Эчейкин вуйлатен.
— Куд ияшак ансамбльыш кошташ тӱҥалынам. Икымше куштымашым акам дене коктын куштенна, марий мурым шкетын йоҥгалтарымемат сайын шарнем, — йоча пагытыш пӧртылеш Р.Иванова. — Жапше годым Эҥерсола школышто Морко искусство школын филиалже лийын. Тушто ме, кудымшо классыште тунемше-влак, кӱслем шоктенна.
Музыклан изи годсек шӱман ӱдыр, 8-ше классым пытарымеке, Йошкар-Олашке толын да культпросветучилищын куштымаш пӧлкашкыже тунемаш пурен. Тудым пытарымеке, «Марий Эл» кугыжаныш куштышо ансамбльыште куштен.
— Ик ий ансамбльыште пашам ыштымеке, марлан лектым. Варажым пелашемым пашаж дене Йӱдвел кундемыш кусареныт. Пырля Омскышто, Барнаулышто, варажым Красноярск кундемыште лийынна. Мыят тудын семын военный лийынам.
Ивановмыт еш 1993 ийыште уэш Марий кундемыш пӧртылын. Раисия Алексеевна йоча дене шинчымекыже, Медведево районысо Сенькан ялысе школышто хореографлан пашам ыштен. А вара, 2003 ийыште, Раисия Алексеевна «Шокто, гармонь» образцовый йоча ансамбльыш толын да 2004 ий годсек тудым вуйлата. Тений ты коллектив 30 ийым палемда.
Кумданрак — «Марий Эл» газетын
26 сентябрьыште лекше номерыштыже лудын кертыда.
Алевтина Байкова.
(Фотом ансамбльын архивше гыч налме.)
