Марий Элын Ялозанлык да продовольствий министерствыжын увертарымыж почеш, 19 сентябрьлан республикыште пырчан да отызан культурым чумыр 141 тӱжем утла гектар гыч 89 тӱжем гектарыштыже солымо, тышеч 88,5 тӱжем гектарыштыже шийме. Тидыже 63 процент лиеш. Ик кечыште 625 гектарыште поген налме. Кодшо ийыште тыгаяк жаплан шурнывечыште 95 процент паша шукталтын. Ик гектарлан шотлымаште кокла шот дене 20,6 центнер дене лектеш (ӱмаште 18 центнер лийын).
Кокияш уржам 20,6 тӱжем гектарыште шийме, 33 тӱжем тонн пырчым налме. Ик гектарлан шотлымаште кокла лектыш 16 центнерыш шуын (ӱмаште 21,5 центнер лийын). Шыдаҥым 22 тӱжем утла гектарыште поген налме, чумыр лектыш – 56 тӱжем тонн. Кажне гектар гыч 25,5 центнерым шийме (ӱмаште 18,9 центнер лийын). Шож лектышат ӱмашсе деч (18,1 центнер) сайрак – ик гектар гыч 20,9 центнерым погат. Ты культурым 24,7 тӱжем гектар кумдыкышто шийме, клатыш 51,7 тӱжем тонн пырче пурен. Пурса 8,8 тӱжем гектар гыч 17,5 тӱжем чоло тонн лектын. Кажне гектар 19,7 центнерым пуэн. Шӱльым 11,63 тӱжем гектарыште 23 тӱжем тонным погымо, гектар еда 19,8 центнер лектын.
Шурным погымо паша Звенигово, Медведево, Оршанке районлаште утларак ушнен толеш, а Килемар, Параньга, Марий Турек, Шернур районлаште шурнывече кумдык эркынрак эрна. Пырчан да отызан культур лектыш Медведево районышто эн сай – ик гектарлан шотлымаште 30 центнер лишке шийыт. Тыгак Оршанке (26,4), Советский (23,8) ден Звенигово (20,8) районлаште пырче умен шочын.
Пареҥгым 2057 гектарыште поген налман гын, 628 гектарыштыже лукмо (31 процент). Кажне гектар гыч 125 утла центнер дене лектеш (ӱмаште 164 центнер дене налме). Эн кугу кумдык (1671 гектар) Курыкмарий районышто, пел тӱжем гектарыштыже погеныт. Чумыр 1283 гектар пакчасаска гыч 1104 гектарыштыже тыгак ты районышто ончен куштеныт, 75 гектарыштыже поген налыныт. Лектыш — ик гектарлан шотлымаште 114 центнер, ӱмаште 194 центнер дене погеныт. Мландым 74,6 тӱжем гектарыште кылмаш куралман, 18,1 тӱжем гектарыште (5 процент) тиде пашам шуктымо.
А.АНДРЕЕВ.
