УВЕР ЙОГЫН

Александр Евстифеев Российын премьер-министрже Дмитрий Медведевлан серышым колтен

Марий Элым вуйлатыше Александр Евстифеев Российын премьер-министрже Дмитрий Медведевлан правительствын 1432 №-ан пунчалжым шуктымым шуяш йодмаш дене серышым колтен. Ты пунчалже ялозанлык техникым 15-20 процентлан шулдынрак налаш йӧным пуа. 

Россий правительствыш тыгай йодмаш дене лекташ программын пайдале улмыжо амалым пуэн. Тений кокымшо пелий мучаш марте  верысе ялозанлык производитель-влак чылаже 445 млн теҥгеаш 148 единице технике дене оборудованийым, 2018-2020 ийлаште 969 млн теҥгеашым налаш шонат. Ты программым шуйымо ялозанлык технике паркым  сайынак уэмдаш, республикысе аграрий ден властьлан ялозанлык техникым уэмдыме планым мучаш марте шукташ полшен кертеш. А тудым кораҥдымылан але программым финансироватлаш чарнымылан кӧра республикысе ялозанлык предприятий-влаклан агромашинам шерге ак дене налашышт логалеш, тидыже ялозанлык производствын пайдалыкшым иземда.

Ялозанлык производитель-влакын ты программым кӱкшын аклымыштым теве мо пеҥгыдемда: «Росспецмаш» ассоциацийын данныйже почеш, тиде кугыжаныш полыш программылан кӧра 2016 ийыште гына Россий мучко 47,7 млрд теҥгеаш техникым налыныт. Тиде жапыштак шке элыште ыштен лукмо агромашиным чумыржо 80,7 млрд тенгеашым ужалыме.

Тенийлан ты программым илышыш пурташ ойырымо 13,7 млрд тенге субсидийым июньыштак кучылт пытарыме. Российын Минпромторгшо декабрь марте эше кок млрд тенгем субсидий семын ешарен ойыраш ямде улмыж нерген каласен.

А.АНДРЕЕВ.

Опубликовать в Одноклассники

Добавить комментарий