Пытартыш жапыште кундемыштына спортын тӱрлӧ видше вияҥеш. Тушко самырык тукым кумылын ушна, тӱрлӧ турнирлаште вийжым терга, сай результатым ончыкта. Теве Шернур посёлко гыч Полина Петухова «боевое искусство» видыште палыме. Тудо профессионал кучедалмашлан, кикбоксинглан, шӱман. Моло дене таҥастарымаште ты вид торжа да лӱдыкшӧ гынат, ӱдыр лывыргылыкшым ок йомдаре. Тыгодым результатше денат ойыртемалтеш, сай кўкшытшӧ дене куандара.
Йошкар-Оласе «Спартак» спортзалыште бокс дене турнир эртыме годым Полина дене кутыралташ йӧн лекте. Ваштарешем, чынжымак, лывырге кап-кылан, мотор ўдыр тольо, саламлалте. Тўжвач ончен спортын тыгай шкешотан, торжа видше дене заниматла манын отат шоналте.
– Ӱдыр-влак тўҥ шотышто художественный гимнастикым, фигурный мунчалтымашым, куштылго атлетикым ойырат, а тый – кучедалмашым. Тидлан могай-гынат амал лийын? – рашемдаш тыршем.
– Ты вид дене нылымше ий заниматлем. Мыланем келша. Спортын мотор видше гай веле чучеш. А лийынже кузе? Шернур посёлкысо 1-ше №-ан школышко тренер толын. Кумылан-влакым рукопашный кучедалмашке чумырен. Мыланнат оҥай лие. Тунам Шернурышто ўдыр, тыгак рвезе-влак группо ыле. Варажым ўдыр-влак «йомыч», шкет кодым. Мый кыртменрак пижынам, рвезе-влак дене пырля ямдылалтынам. Ныл тылзе гыч икымше турнирыште вием тергенам. Вара – весыште. Результат иканаште куандарыше лийын огыл.
– Мушкындылаш кўлын, поснак кикбоксингыште. Удар деч лўдын отыл?
– Тўҥалтыште лўдмашат лийын. Вара шкем сеҥаш, пеҥгыде лияш тунемат. Профессионально кушкаш кумыл лектын. Тренерем мыланем ўшанен, калыкыште манмыла, нимо уке гыч «ненчен», ты видлан кумылаҥден. Кузе ыштышашым, ямдылалтшашым умылтарен. Технике шотыштат чот полшен, кызытат кўлешан ой-каҥашым пуа.
– Ача-ават тидым кузе ончат?
– Тўҥалтыште изиш заниматла да чарна манын шоненыт. Вара шинча йўлымым, кыртмен пижын тренировкыш коштмым, турнирлаште ойыртемалтмым ужын, келшеныт. Ачам, Виктор Дмитриев, – шкежат спортсмен. Жапше годым тале ечызе лийын, республик, Россий кўкшытыштӧ результатше дене ойыртемалтын.
– Койыш-шоктыш дене пӧръеҥым шарныкташ тўҥалат манме ок лўдыктӧ? Ӱдыр-влак дене кыл могайрак?
– Тиде мыйым нимыняр огеш лўдыктӧ. Мӧҥгешла, сай веле. Ӱдыр, классыште тунемше-влак денат кыл сай. Ӱдырамаш лывыргылык ок йом, шонем. Рингыште виян, тале улат, чытымаш дене ойыртемалташ тыршет, а тыглай илышыште ныжылге лийме, моторын чийыме шуэш. А таҥасаш кумыл уло – тиде эн тўҥ. Тек молат шканышт келшыше пайдале пашам муыт.
– Икымше боевой кугу старт. Чуваш Республикын командыжын чапшым аралет?
– Икымше боевой старт ала-молан ончыкылык сеҥымашлан кугу ўшаным пуэн. Тыге мый умбакыжат тренироватлалтынам. Юл кундем округышто, Россий, варажым тўнямбал кўкшытышӧ вийым тергыме, тале соперник-влак дене таҥасаш логалын. Тренировкылан кызыт кечеш 2 шагат утла кая, а турнир деч ончыч, кечеш кок гана ямдылалтын, ныл шагатышкат погына. Чын, кызыт Чуваш Республикын командыштыже улам. Тушто кикбоксинг дене федераций уло, а Марий Элыште эше уке.
– Ӱмаште Ирландийыште тўнямбал кўкшытан таҥасымаште сеҥышыш лекташ чыла йӧн лийын?
– Омскышто эртыше Российын чемпионатыштыже шке нелытанем-влак коклаште ончыко лектынам (52 килограмм нелытан-влак (К-1) коклаште). Тыге Ирландийышке тӱнямбал кӱкшытан первенствышке (2016 ий, 27 август — 3 сентябрь) каяш корно почылто. Корнылан окса дене полшышо-влаклан пеш кугу тау. Тидын шотышто нелырак ыле. Тушто, чынжымак, сеҥаш шонен кайыме. Тидлан чыла шотыштат ямде лийынам. Тушто американ судья мыйын ик ударем шотлен огыл. Сандене кокымшо верыш лектынам.
С.Шабердин, тренерже:
– Полинам кум ий наре тренироватлем, шке гыч. Ӱдыр виян, шонымыжым шукташ тыршыше, спортышто ӱшаным пуышо, шкеж верч шоген кертше. Икымше гана ужмекемак, кертшашыжым умыленам. Кызыт Полина Российын юниор сборный командыштыже ик эн тале спортсменкылан шотлалтеш. Тиде видыш пытартыш жапыште ӱдыр-влак палынак ешаралтыт. Сандене таҥасымаш кугу кӱкшытыштӧ эрта. Опыт да сай тренер деч посна ок лий. Спорт мастер нормативым шуктен, но эше документым налме огыл. А проблемыже, иктыланат у огыл, эреак финанс дене кылдалтеш. Кумыл уло – тугеже результат саемеш, шонем.
Полина Петухова кызыт кикбоксинг дене Российын юниор командыштыже. Кум ий жапыште кикбоксинг дене Российын чемпионатше ден первенствыштыже, тӱнямбал первенствын сеҥышыже да тӱнямбал кӱкшытан Бриллиантовый кубокын озаже лийын. Тыгак тайский бокс дене Россий кӱкшытыштӧ ойыртемалтын. Юл кундем округышто вийжым тергымеке, спорт мастер нормативым шуктен. Тыгайже Марий Элыште икте гына.
Ӱдыр Шернур посёлкысо 1-ше №-ан школым тунем лектын, кызыт Чебоксарыште тунемеш, Чуваш Республикын сборный командыжын чапшым арала. Март мучаште Российын первенствыштыже вийжым терга.
Е.Эшкинина.
Фото: П.Петухова тренерже С.Шабердин дене пырля.
Авторын фотожо.
Сервер/ Эшкинина/ Шабердин1
