Марий Эл вуйлатышын пашажым шуктышо Александр Евстифеев чодыра озанлык пашаеҥ-влакым пайремышт дене саламлен.
Тудо чодырам ончен куштымо да аралыме пашам науко дене пырля, тыгак ончыл разработко-влакым кучылтын шукташ кӱлмым палемден, кугу тӱткышым санитарный эрыктымашлан ойырен. Тыгак чодырам закондымын руымым чараш полшышо пашам чолганрак ыштышаш нерген ойлен.
— Мый чыла районышто лийынам да кажныштыже гаяк йодыныт: «Республикыште илыше-влакын пӧртым але мончам чоҥаш чодырам возыктен налаш йӧнышт кунам лиеш?» Республикыште кушшо поянлык дене пайдаланаш еҥ-влакын йӧнышт лийшаш, — каласен А.Евстифеев. Тыгак палемден:
— Чодырам тугак огыл, переработатлен ужалыман. А тиде – йӧршеш вес ак да ешартыш паша вер-влак. Кызытеш тидым ме келшен толшын огына шукто. Инвестиций кӱлеш. Но ме чылажымат шекланен шуктышаш улына. Молан манаш гын инвестор-влак дене пырля мемнан деке мошенник-влакат шӱшкылтыт. Нуным чактараш кӱлеш. Арендыш пуымаштат кучылтшаш йӧн шуко. А тидыже отрасль вуйлатыше-влакын пашашт.
Александр Евстифеев тыгак республикын 2028 ий марте чодыра планжым ыштыме нерген ушештарен да тудын дене келшышын пашам шукташ кӱлмӧ нерген ойлен.
Регион вуйлатышын пашажым шуктышо пытартышлан отрасльыште тыршыше-влаклан пашаштым сайын шуктымыштлан да марий кундемым вияҥдымашке надырым пыштымыштлан тауштен. Эн сай лесник-влак награде дене палемдалтыныт.
Л.Камалетдинова.
