Йошкар-Олан ончычсо мэрже Павел Плотниковын делажым оласе судышто тиде кечылаште умбакыже ончаш тӱҥалыныт.
Ушештарена: тудо предприниматель пашам закондымын шуктымылан да взяткым налмылан титаклалтеш. Ончычсо мэрым 2015 ий 3 декабрьыште арестоватленыт.
Шуко жап эртыме деч вара икымше заседаний 12 сентябрьыште лийын. Тушто прокуратур гыч представитель ден титаклыше-влак велым свидетель-шамыч ойленыт.
Кокымшо заседаний эрлашыжым, 13 сентябрьыште, лийын. Ты кечын Павел Плотниковын Йошкар-Оласе Волков уремыште верланыше шуко пачеран пӧртыштӧ илыше пошкудыжо-влак показанийым пуэныт.
Черетан заседаний 20 сентябрьыште лийшаш.
Ончычсо мэр шкенжым титаканлан огеш шотло. Тудо титакдыме улмыжым доказатлаш шона.
Л.Камалетдинова.
