Йошкар-Олаште пачерлан, илыме вер да коммунальный услугылан тӱлыдымӧ парым ятырак погынен. Тудым пытарыме йодышым решатлаш администрацийын, управляющий организаций-влакын, Единый шотлышо рӱдерын да рӱдоласе 1-ше ТЭЦ-ын вуйлатыше пашаеҥышт совещанийым эртареныт.
Управляющий компаний ден энергокуатым пуэн шогышо организаций-влак талук тӱҥалтыш гыч парыман-шамычлан суд марте шуктымеш ЖКУ услугылан тӱлаш кӱлмӧ нерген 33 тӱжем утла шижтарымашым колтеныт. А шижтарымашан кагазлаште ончыктымо чумыр парымже изижак огыл – 47 миллион теҥгеш погынен. Тыгак пуымо услугылан еҥ-влак деч оксам кӱрын лукмо шотышто судыш чылаже 59,5 миллион теҥгеаш кок тӱжем утла искым колтымо.
Единый шотлышо рӱдерын специалистше-влак суд пристав да управляющий компаний-влакын пашаеҥышт дене пырля рейдым эртарымышт годым парыман-влакын пачерыштышт чӱчкыдын вучыдымо уна лийыт. Тылеч вара пашаеҥын пашадарже гыч оксам кучен кодаш тудын ыштыме организацийыш исполнительный листым колтат. Парымым петырыме шотеш должникын погыжымат арестоватлат.
Парыман улшо потребитель-влаклан коммунальный услугым пуымым чарныме нерген ик тӱжем наре шижтарымашым колтымо. 82 пачер озалан улшо парымым пытараш раш жапым палемдыме лийын, но тиде сроклан тӱлен пытараш йӧным муын але тидым ышташ шоненжат огытыл. Сандене нунылан коммунальный услугым пуымым чарныме. Но 48 еҥже тидын шотышто илышыжым нелемдаш тореш лийын, чумыржо ик миллион утла теҥгеаш парымым пытараш оксам муын.
Кӧжӧ умылаш лийме амал дене парымым иканаште петырен ок керт гын, нуно почешрак тӱлаш йодын соглашенийым ыштен кертыт.
Эше иктым мондыман огыл: жапыштыже тӱлыдымылан пени шотлалтеш. Тудыжат жап эртыме семын шагал огыл погына.
А.АНДРЕЕВ.
