КУЛЬТУР ДА ИСКУССТВО

Тале артист, уста кидмастар, колызо…

10 сенябрьыште М.Шкетан лӱмеш Марий кугыжаныш драме театрыште Марий Эл Республикын калык, Россий Федерацийын сулло артистше, М.Шкетан лӱмеш кугыжаныш премийын лауреатше Олег Кузьминыхын лӱмгечыжлан пӧлеклалтше пайрем лиеш. Театрыш толшо-влаклан «Йӧратымаш да кӧгӧрчен-влак» спектакльым ончаш темлат. Тушто Олег Елизарович  Митям модеш. 

— Тиде спектакльын сюжетше, мутат уке, калыклан палыме, но туге гынат тудым уэш да уэш ончымо шуэш, — палдара О.Кузьминых. – Палемдыме образым чоҥымо  годым шуко шонымо, калыклан лишыл да тунамак ала-могай оҥайым пуртымо шуын. Мутлан, умша гармонь дене шоктем. Тидын олмеш ончыкыжым балалайкым пуртынем.

М.Шкетан лӱмеш Марий кугыжаныш драме театрыш У Торъял кундемын шочшыжо Олег Кузьминых А.Луначарский лӱмеш кугыжаныш театр искусство институтым тунем лекмекыже толын. Ынде йӧратыме пашажым 35 ий шукта. Тиде пагытыште моткоч шуко спектакльыште рольым модын да кызытат сценыште тӱрлӧ сынан образым мокоч оҥайын, келгын чоҥа. Образым чоҥымо годым пеш шуко тӱрлӧ пӱрымашан пӧръеҥын илышыжым илен эртара, тудын кӧргӧ чонжым, шонымашыжым умылаш да ончышо деке шукташ тырша.

— Эше театрыш толмекемак мылам ийгот дене кугурак рольым модаш ӱшаненыт. Тунамсе артист-влак Юрий Иванов мый дечем латвич ийлан кугурак лийын гынат, мыйын эргымым модын. Кажне гана «эргым» манмем годым чонемлан нелын чучын, — шарналта тунамсе пагытшым Олег Елизарович. — Ача образыште лекташ тунам лӱмынак ӱпым чалемдыме, пондашым пижыктыме. Лач кызыт тиде рольым модаш келшен толмыла чучеш.

Чын, Олег Елизарович пытартыш жапыште ятыр спектакльыште ачан, кочан але кугурак ийготан пӧръеҥ рольым модеш. Уло шӱм-чоныш пурен лекмыла модеш, шкеж дене пырля ойгырыкта, илыш нерген шонаш тарата, кӱлеш гын шинчавӱдымат кӱрышт луктеш.

Театрыш пашаш толмыжлан О.Кузьминых кажне кечын Юмылан туашта, вет лач тушто тудо илыш йолташыжым, пелашыжым, вашлийын.

Кумданрак — «Марий Эл» газетын
16 сентябрьыште лекше номерыштыже лудын кертыда.

 

Алевтина Байкова.
(Фотом театрын архивше гыч налме.)

Опубликовать в Одноклассники

Добавить комментарий