УВЕР ЙОГЫН

Калык фронтын активистше-влак Звенигово район эрыктыме сооруженийым тергеныт

Общероссийский калык фронтын Марий Элысе активистше-влак Звенигово район Красногорский поселкысо эрыктыме сооруженийын Элнетыш лавыран вӱдым кышкымыж шотышто «Марий Чодыра» национальный паркын коллектившын вуйшиймашыжым тергеныт. Тидыже тыгак кодеш гын, ончыкыжо регион кугытан экологий катастрофыш шуктен кертеш. Ты эҥер ЮНЕСКО-н «Европын эн яндар эҥерже-влак» спискышкыже пурталтын. 

   Сооруженийым тергыме годым рашемын, тудо чынжымак аварий тӱрыш шуын, кызытак капитально олмыктыде ок лий. Поселко ден федерал кӱшытан «Марий Чодыра» национальный парк коклаште верланымыже поснак кугу азаплынымашым луктеш. Кызыт ӱпшышӧ лавыран вӱд мландым нӧлталын авырен налме тошто эҥерйолеш погына, тудыжо шукертак йыгыжгын ӱпшалтше купыш савырнен.

Тений майыште Росприроднадзор управленийын специалистше-влак вӱдан кундемым, Элнет сер воктенсе аралыме кумдыкым шымлен лекмекышт, эрыктыдыме лавыран вӱдым йоктарыме эн лӱдыкшӧ верым рашемденыт. Тудыжо айдеме деч кодшо вашакан да тӱсан лийын, торашке ӱпшалтын. Вӱдын яндарлыкшым тергыме годым лавыран вещества утыждене улмым ончыктен. Тыге икымше категорийыш пуртымо кол озанлык объект чотак амырталтеш, тудым йомдарашат шуко ок кӱл.

Сооруженийын аварийный улмыжым район вуйлатыше-влакат огыт шылте. Тудым олмыктымо пашам республикын адресный инвестиционный программышкыже пуртымо. Проектымат ямдылыме, тудо 19 миллион теҥгеш шуеш, подрядчикат уло. Но кодшо ийын тидлан республикын бюджетше гыч  ныл миллион олмеш улыжат 1,6 миллион теҥгем ойырымо лийын.

— Элнет эҥер кундемыште ты азапым ме посна контрольышто кучена. Тудым регион вуйлатыше марте шукташ шонена. Элнет Кугу Юлын шола эҥерйолжылан шотлалтеш, сандене «Юл эҥерым тазаҥдымаш» федеральный программыш чулымынрак ушнаш темлена, — манеш ОНФ-н Марий Элысе региональный штабшын сопредседательже Руслан Гизатуллин. – Эрыктыме сооруженийын чот шолдыргымыжлан кӧра Европын ик эн яндар Элнет эҥержым йомдараш огына пу.

А.АНДРЕЕВ.

Опубликовать в Одноклассники

Добавить комментарий