Кодшо арня мучаште Александр Евстифеев Йошкар-Оласе 1-ше №-ан ТЭЦ-ыште лийын.
Предприятийын директоржо Игорь Бондарчук республик вуйлатышын пашажым шуктышылан ТЭЦ мучко экскурсийым эртарен да шуктымо пашашт, учрежденийын историйже, пашаеҥ-влаклан полшымо шотышто мо ышталтме нерген каласкален.
А.Евстифеев электрический подстанцийым ончен савырнен, котельныйыште, цехлаште лийын.
Директор дене мутланымыж годым регион вуйлатышын пашажым шуктышо объект-влакын шыже-теле пагытлан ямде улмышт, шокшым пуышо сеть-влак шӱтлымӧ але моло туткар лийме годым нине нелылыкым кораҥдыме шотышто кеҥежым гидравлический тергымаш кузе эртыме нерген йодыш-влакым каҥашен.
Тыгак тудо административно-технический пӧлемлашке да тӱҥ диспетчерский пунктыш пурен лектын. Тушто специалист-влак лӱдыкшыдымылыкым да шокшо ден электричестве кузе пуалтмым эскерат.
Игорь Бондарчук Александр Евстифеевым улшо нелылыкышт-влак денат палдарен. Ик эн кугужо – тепловой энергий дене пайдаланыше-влакын оксам жапыштыже тӱлыдымышт; тергыше орган-влакын утыжденат шуко гана тергымышт; квалифицированный кадр-влакын ситыдымышт да икмыняр моло.
ТЭЦ директор предприятийын пашаштыже палдырныше сай велжымат палемден. Мутлан, пайдалын огыл ыштыше 10 утла котельныйым петыреныт, шӱ дене олтымо 4 котельныйым газ дене пайдаланымыш кусареныт. Тиддеч посна пытартыш лу ий жапыште пӱтынек предприятийын вийже дене вӱдым ырыктыше 4 да паран 1 котелым шынденыт да пашаш колтеныт, 12 котельныйым автомат системыш кусареныт. Ынде нуно оперативный пашаеҥ деч посна ыштат.
— Икымше номеран ТЭЦ — кӱлешан предприятий. Тудо сайын пашам ышта, уым пурта. Предприятий телылан ямде, — журналист-влаклан пуымо интервьюштыжо палемден А.Евстифеев.
Илыме вер да коммунальный озанлык ден социальный сферысе объект-влакым олтымо пагытлан ямдылыме паша Марий Элыште республикысе правительствын пенгыдемдыме организационно-технический мероприятий-влак план-графикше дене келшышын ышталтеш. Кызыт технический, организационный да окса дене кылдалтше йодыш ден задаче-влак рашемдалтыт. Чыла паша 1 октябрь марте мучашлалтшаш.
* * *
Александр Евстифеев Йошкар-Оласе Шернур трактыште корным кузе олмыктымым ончен лектын.
Тылзе дечат шагалрак жап ончыч тудо ты кундемыште лийын ыле. Тунам республик вуйлатышын пашажым шуктышо деке ик ӱдырамаш лишемын да тушто йолешке-влаклан вончаш корным, тыгак тротуарым ышташ йодын. Тыге Шернур трактын ты кумдык корныжым олмыктымашке вашталтышым пурташ пернен да еҥ-влакын йодмышт почеш «зебрым», тротуарым да корно воктене авыртышым, разметкым ыштеныт, корно знакым шогалтеныт. Компаний-подрядчик директорын алмаштышыже Алексей Улановын каласкалымыж почеш, кудалме корнышто вӱд ынже погыно манын, тудым шотыш конденыт, пушеҥге ден вондерым руэныт.
— Йолешке-влаклан вончаш верым келыштарыме шотышто еҥ-влакын йодмыштым тӱрыс шуктымо. Паша жапыштыже, вараш кодде ышталтын, еҥ-влакын кучем ончылан шындыме задачышт тӱрыс шукталтын. Олан кучемже ден чоҥышо компанийлан тау. Чылаштлан лӱдыкшыдымӧ корным тыланем, — ты кумдыкышто ыштыме пашам аклымекше палемден Александр Евстифеев.
Йошкар-Олаште, Шернур трактыште, ик километр утла кумдыкышто корным ачаленыт. Тӱҥалтыште тудын акше 9 млн. наре теҥгешке шуэш манын палемдалтын. Но ешартыш пашам ышташ логалме дене акше 360 тӱжем теҥгелан шергештын.
Л.Камалетдинова.
