Республикылан да тыште илыше-влаклан ик эн тӱҥ кече шеҥгелан кодо. 10 сентябрьыште ме, йӱкнам пуэн, шке ончыкылыкнам рашемдышна: ынде Марий Элым Александр Евстифеев вуйлаташ тӱҥалеш.
100 процент бюллетеньым тергымеке да шотлымеке, пале лийын:
Александр Евстифеевлан 88,27 % еҥ шке ӱшанжым ончыктен да йӱкшым пуэн.
Альберт Федоров – кокымшо верыште. Тудо 5,06 % йӱкым поген.
Наталия Глущенкон — 3,48 %.
Валентина Злобинан — 1,76 %.
Участке-влакым ончен савырныш
А сайлымаш кечын избирательный участке-влакын почылтмекышт икмынярыштышт ик эн ончыч Александр Евстифеев лие. Тудо Йошкар-Оласе лу наре избирательный участкым ончен савырныш. Эн ончычак 29-ше №-ан школышто верланыше кум участкыш пурен лекте. Тылеч вара 28-ше №-ан лицейыште тыгак кум участкыште лие. Пытартышлан Ленин лӱмеш тӱвыра полатыште верланыше кок участкым тергыш. Кажныштыже лиймыж годымат паша кузе кайыме, могай ситыдымымаш улмо нерген йодо да сай паша кечым тыланыш.
Александр Евстифеев ден пелашыже тӱвыра пӧртын фойештыже верланыше буфетыште икмыняр изи когыльым нальыч…
Лу наре участкым ончен савырнымек, республик вуйлатышын пашажым шуктышо палемдыш:
— Избирательный участкыш мийыше-влак программе-влак верч йӱклат. Таче, мыйын шонымаште, тугай кече, кунам шке решенийыштым еҥ-влак тиде але тудо программе верч шке йӱкым пуымышт дене илышыш пуртат. Могай результат лиеш, тудым мый пагалем.
Йӧнанрак лийже манын тыршыме палдырныш
Тений эртаралтше сайлымаште еҥ-влаклан шуко шотышто йӧнанрак лийже манын ышташ тыршыме шижалте. Мутлан, коляске дене пайдаланыше инвалид-влак але марте эре гаяк мӧҥгыштышт гына йӱкленыт гын, тений кумылан-влаклан участкыш мияш йӧным ыштеныт. Тидлан Йошкар-Олаште лӱмынак автобус ойыралтын ыле, да 29-ше №-ан школышто верланыше 34-ше №-ан участкыште лӱмын колясочник-влаклан келыштарыме участкыш нуным икмыняр гана кок еҥ дене кондыш. Коляске дене пураш тыште пандусым пыштеныт. Кажныж дене пырля лишыл еҥже толын гынат, волонтер-шамычат пурташ да йӱклашышт полшышт.
Начарын ужшо ден колшо-влак утларакше Йошкар-Оласе 7-ше номеран школышто почмо участкыште йӱкленыт. Тидыже ВОС-ын тораште огыл верланымыж дене кылдалтын. Нуныланат толаш да йӱклаш лишыл еҥышт полшышт гынат, кӱлеш полышым волонтер-влакат пуаш тыршышт.
Тыгай сӱрет КЭГ дене йӱклаш келыштарыме участкылаштат палдырныш. Йошкар-Олаште 38 тыгай участке гыч иктыже Мер-политике рӱдерыште верланен ыле. Ӱмаште, мутлан, КЭГ дене йӱклымӧ годым мыят йӧндымылыкым мыняр-гынат шижым гын, илалше ковай ден кочай-шамыч нергенже мом ойлаш?! Мом кузе ыштышашым волонтер-влак тренажер КЗГ-ыште ончыктен колтеныт, но шке семын йӱклаш тарванымеке, мом ышташ палыде, ӧрын шогалыныт. Тений гын ӱдыр-рвезе-шамыч дене пырля эше сайлыше-влак ваш-ваш полшен кертыныт, сандене ятырлан куштылго лийын.
Пайрем семын эртен
Изи годым, шарнем, сайлымаш кече яллаште кугу пайрем семын эртен. Йӱклымаш деч вара ача-авамыт кугу гына пӱтыртыш калачым, лимонадым, моло шере кочкышым налын конденыт, клубышто концертым ончыктеныт, а тудын кумдыкыштыжо муро шергылтын. Тиде йӱлам кызытат ятыр вере шукташ тыршат. Мутлан, мыйын йӱклымӧ Медведево районысо Знаменский поселкысо тӱвыра пӧртыштӧ верланыше участкыште тиде кечын кок коллектив концертым ончыктен да муро ден куштымашышт дене чоныш чынже денак пайрем шӱлышым пуртен. Ты участкын председательже О.Семенован ойлымыж почеш, 12 шагат жаплан тыште 501 еҥ йӱклен ыле. Тидыже 22 процент лийын.
Икымше иктешлымаш
Сайлымаш кечын правительство пӧртын фойештыже Марий Элысе Рӱдӧ сайлыман комиссийын пресс-рӱдерже верланен ыле. 10 шагатат пелылан ЦИК-ын секретарьже О.Крюкова икымше иктешлымаш дене палдарыш:
— 10 шагат марте республикыште чылаже 8,83 процент калык йӱклен;
— эн шукын тыгай районлаште йӱкленыт:
Волжский – 15,8 процент,
Оршанка – 14,6 процент,
Марий Турек – 13,8 процент,
Морко – 13,4 процент.
— Йошкар-Олаште ты жаплан 5 процент наре калык сайлымашке миен.
Ӱшаныдымаш дене кылдалтын
Сайлымашке чылаже 43,62 % еҥ миен. Марий Элысе ЦИК председатель Ирина Татаринова ты чотын изи улмыжым тыге умылтарен: тиде ӱмашсе деч вара еҥ-влакын сайлымашлан ӱшаныдымышт дене кылдалтын.
Кеч-мо гынат сайлымаш эртен. У вуйлатыше пале. Ынде ме чыланат тудын деч илышнам сай велыш вашталташ тыршымыжым вучаш тӱҥалына…
Депутат-влак коклаште
Тиде кечынак республикысе Волжский районышто да Козьмодемьянск олаште Кугыжаныш Погыныш депутат-влакым ешарен сайленыт.
Волжский районышто Сергей Федоров 45,45 % дене эртен. Игорь Кудрявцев 43,10 % дене кокымшо верыште.
Козьмодемьянскыште Светлана Громова сеҥен. Тудо 51,92 % йӱкым поген.
Пошкудо кундемлаште
10 сентябрьыште Российыште чылаже 16 регионышто вуйлатышым сайленыт.
Пошкудо Киров областьыште кызытсе вуйлатышын пашажым жаплан шуктышо Игорь Васильев сеҥен. Тудо 64,03 % йӱкым поген.
Сергей Мамаев (КПРФ) верч 18,99%, Кирилл Черкасов (ЛДПР) верч 10,03% еҥ йӱкленыт. Шке жапыштыже нуно мемнан денат кандидатурыштым темленыт ыле.
Удмуртийыштат республик вуйлатышын пашажым жаплан шуктышо Александр Бречалов сеҥен. Тудын верч 78,16% калык йӱклен.
Пермь крайыште губернаторын пашажым жаплан шуктышо Максим Решетников 82,06 % йӱк дене сеҥен.
Карелийыште вуйлатышын пашажым жаплан шуктышо Артур Парфенчиков сеҥен. Тудо 61,34 % йӱкым поген.
Коми Республикыште калык тыгак вуйлатышын пашажым жаплан шуктышо Сергей Гапликовлан ӱшанымыжым ончыктен да ен-влак 61,7 % йӱкым пуэныт.
Любовь Камалетдинова.
