СОЦИАЛ ИЛЫШ

Сад-пакчазым колыныт…

– Маргарита, ӱшанет-уке: мемнан деке Александр Евстифеев толын! – йыҥгыртыше телефонлан «алло» манын, вашештен шуктышым веле, тунамак «Малиновка» сад товариществысе ончычсо участкем гыч пошкудо ӱдырамаш Людмила Леонидовнан моткоч веселан йоҥгалтше йӱкшым кольым. – Мемнан ятыр ий возымо вуйшиймашнамат шотыш налыныт, ынде нуным решатлаш тӱҥалыт маныт!

Оҥай, Александр Александровичым «Малиновка» сад товариществыш могай пӱсӧ йодыш намиен? Мыйын шонымаште, тиде озанлыкыште вуйым шияш амал утыжым укеат. Тышке автобусат май гыч октябрь марте кече еда чӱчкыдын коштеш, эсогыл сад йыр кудал савырна (а тидыже калыклан путырак йӧнан), корнат сай (ӱмаште гына у асфальтым оптышт, а сад кумдыкышто гын кажне ийын олмыктат), вӱдат икымше кылме толмеш уло (моло вере семын график дене огыл, а йӱдшӧ-кечыже), электротулым йӧршын огыт йӧртӧ (тудыжо кок кужу уремым телыже-кеҥежше волгалтара), шӱкат лукталтеш, кумдыкат эрыкталтеш, конторат пашам ышта…Тыште эр шошо гыч теле толмеш, эсогыл идалык мучко илыше-влак шагалын огытыл.

– Чыла тиде – тӱжвач ончалмаште гына, – келгын шӱлалтен мане «Малиновка» сад товариществын председательже Александр Зуев. – Сад-пакчазе-влаклан чыла гаяк йӧным ышташ тыршена гынат, пашана дене келшыдыме-шамыч эше ятырын улыт. Шагал огыл еҥ взносын кугытшо дене ок келше…    

Таче Марий Элыште коммерческий огыл 102 сад товариществе уло, тушто 60 тӱжем наре сад-пакчазе (ешыштге 150-180 еҥ) тырша. Тидыже республикысе чумыр калыкын чырык ужашыже лиеш! Тыгай сынан участке полшымо дене 15 тӱжем деч шагал огыл еш пареҥгым идалык мучкылан ситара. Тачысе куштылгыжак огыл экономике жапыште тиде пеш кугу полыш да анык.

– Сад-пакчам ола, посёлко воктен кучышо-влак тӱҥ шотышто шошо гыч шыже марте пашам ыштат. Тӱжвач ончалмаште, тыште мо нелыже манын шоналтет, но проблеме ситышынак уло. Нунын кокла гыч икымшыже – электроэнергийлан кугу тариф, тудо ынде газ плитан да чыла шотыштат йӧнан пачерыште илыше-влакын дене икгай лийын. Кокымшо – сад товариществын балансыштыже улшо электрический озанлык, тудо сад-пакчазе-шамычлан моткоч шергын шуэш. Кумшо – уто лектышым ужалыме але сдатлыме шотышто палдырныше нелылык. Нылымше – тӱшкан пайдаланыме транспортышто улшо шотдымылык… – сад товариществе-влакын проблемыштым радамла Россий садовод-влак ушемын регионысо пӧлкажын председательже Геннадий Петрушин. – Нине йодыш дене кушко-гына коштын огынал – чыла вере кидым веле лупшалыныт. А теве республикнан у вуйлатышыже мемнам кольо! Шукерте огыл Александр Александрович «Малиновка» сад товариществыш толын кошто, тыгай сынан озанлыкым вуйлатыше ден сад-пакчазе-влакын чон ойгыштым тӱткын колышто да чыла гаяк проблемынам полышкалышыже-влаклан решатлаш кӱштыш. Куанен палемдем: таче Йошкар-Олаште сад-пакча сатум ужалаш 135 верым ойырымо! Электротул дене пайдаланыме шотыштат сӱрет вашталтшаш: ынде сад-пакчазе энергетик-влак дене вигак ойпидышым ыштен кертеш, тыгеже роскот 30 наре процентлан иземшаш. СНТ вуйлатыше-шамыч кокла гыч шукынжо тореш улыт гынат, сад товариществысе электросеть ден трансформатор подстанцийымат энергетик-шамычлан пуаш лийме, оксала. Тиде паша куштылго огыл, но кӱлешан. Транспорт йодыш кызытеш пӱсак кодеш. Медведево районысо 52 сад товариществыш тудо шуэн огыл коштеш гын, Волжский районышто ты шотышто паша моткоч томам. Тиде проблемыланак кӧра Шернур районышто латик сад товариществе гыч нылытше петырнен.

…Икманаш, чарак шуко гынат, ончыкыжым сад-пакчазе-влакын илышышт саемын кертмылан ӱшан уло. Тидланже сад товариществе вуйлатыше-шамычлан веле огыл, калыкланат тарванылман, шке права дене тичмашын пайдаланыман.

М.ИВАНОВА.

Опубликовать в Одноклассники

Добавить комментарий