УВЕР ЙОГЫН

Кок заводшат кугу кӱкшыт дене куандарат

Марий Эл вуйлатышын пашажым шуктышо тиде арнян республикысе ик эн кугу производственный предприятийлаште: Полупроводник прибор ден  Марий машиностроитель заводлаште – лийын.

Александр Евстифеев коктыштыжат предприятий-влакын историйышт дене палыме лие, пашаеҥ-влак дене мутланыш, вуйлатыше-влак дене производствым ончыкыжо кузе вияҥдаш шонымышт нерген каҥашышт.

Полупроводник прибор «Росэлектроника» холдингыш пура. Металлокерамик корпус-влакым ыштымаште Российыште ик эн тӱҥлан шотлалтше ты заводышто интегральный микросхеме-влаклан 800 утла тӱрлӧ корпусым ыштен луктыт. Заводын генеральный директоржо Петр Козлов Кызыт эшеат уым, микроэлектроникын тачысе кечын йодмашыжлан келшен толшо, йот эллаште ямдылымым шкенанлан вашталтен кертшашлык корпус-влакым ыштымылан кугу тӱткыш ойыралтеш.

Цехлаште шуко вереже пӧлем-влакым кызытсе жапын йодмыж почеш ыштыме палдырныш.  

— Тыште мый моткоч кӱкшӧ квалифициян коллективым ужым. Кумло утла процент  пашаеҥ – тиде самырык-влак. Тӱрыс налмаште, предприятий кугу лектыш дене да сайын пашам ышта, — палемдыш А.Евстифеев.

 

Марий машиностроитель завод дене палыме лиймашат верысе тоштер гыч тӱҥале. Вараже завод мучко эртыме годым Александр Евстифеевлан генеральный директор Борис Ефремов предприятийыште радиотехнический комплексым, управлений системым, шотлышо техникым лукмо, кугыжаныш обороно заказ почеш да вес ээлашке колтымо, тыгак гражданский продукцийым ямдылыме нерген каласкалыш. Вооруженийым да военный техникым ыштен лукмыж дене завод «Концерн ПВО «Алмаз-Антей» ОАО-шко пура.

Умбакыже завод нерген документальный фильмым ончыктышт.  Пытартышлан А.Евстифеев кӱртньым обрабатыватлыше 82-шо номеран цехын пашаж дене палыме лие.

— Пашам ыштен моштымыж дене тиде производство кумылым нӧлта. Ме производствышто веле огыл, пӱтынь предприятийыште порядкым ужына. Завод кугу кӱкшытыш шуын, — журналист-влаклан пуымо интервьюштыжо палемдыш А.Евстифеев.

Любовь Камалетдинова.

Опубликовать в Одноклассники

Добавить комментарий