ТАЗАЛЫК

Вакциным кондымо: привикым ышташ жап

Кажне ийын эпидемий тӱҥалме деч ончыч калыклан грипп дечын иммунизаций ышталтеш.

Грипп икте деч вес айдеме деке пеш писын кусна, сандене прививкым ыштыдыме еҥ эпидемий жапыште куштылгын черланен кертеш. Икте-весе дене чак мутланымылан, тыгак пырля модмылан кӧра йоча-влакынат черланен кертме лӱдыкшышт пеш кугу.

Черын нелылыкше ден косаже айдемын организмже дене веле огыл, прививкым ыштымыже але ыштыдымыж денат чак кылдалтын. Шукияш опыт ончыкта: грипп дене тӱҥ шотышто прививкым ыштыдыме-влак черланат. Черын нелылыкшат утларакше нуныланак логалеш.

Кызыт калыкым инактивироватлыме вакцине дене иммунизироватлат. Вирусын у видшым эскерен шогышо Тазалыкым аралыме тӱнямбал организацийын темлымыж почеш, тудын составше ий еда уэмдалтеш. Тиде вакцине грипп дечын сайын арала, тазалыклан лӱдыкшӧ огыл, инфекцийлан вияҥаш амалым ок ыште, вет производствын кызытсе технологийже дене тудым кӱлынак эрыктат.

Икшыве-влакым куд тылзаш гыч тӱҥалын, 1-11 класслаште тунемше, тыгак студент-шамычым, Профилактический прививкын национальный календарьже дене келшышын, эпидемий деч ончыч федеральный бюджет кӱшеш прививатлат.

Кызыт вакциным регионлашке кондыштараш тӱҥалме. Мемнан республикышкат 18 ияш марте ӱдыр-рвезе-влаклан «Совигрипп» вакцинын икымше партийже (41,8 тӱжем дозо) толын. Тидыже кундемысе чумыр йоча гыч пелыжлан сита.

Иммунизаций прививкым ыштыме деч вара 2-3 арня гыч веле полшаш тӱҥалеш. Тидымак шотыш налын, процедурный кабинет деч вара шкем поснак эскерыман. Икымше жапыште шкем чын кучаш тыршыман.

  1. Прививке ден арака мужыр огытыл. Утыждене да чӱчкыдын йӱмӧ арака айдемын тӱрлӧ органже ден системыже-влакым пытара. Поснак мокш орлана. Тыгай годым организмлан сай иммунитетым ыштен лукташыже неле лиеш. Тазалыкым пеҥгыдемдаш манын, вакцинаций деч вара балансироватлыме кочкышым кочман, рацион гыч аракам кораҥдыман.
  2. Экзотым ида коч. Экзотлан шотлалтше тиде але вес кочкыш организмлан могай реакцийым пуэн кертеш – эсогыл эн кугу опытан врач тӧр каласен огеш керт. Тазалыкыште палдырныше ситыдымашым, прививкылан реакций манын, йоҥылыш шонаш лиеш. Тылеч посна чыла уто-сите иммунитетым луштара.
  3. Чот ида кылме, ида ыре, шкем стресс деч аралыза.
  4. Шуко еҥан верыш ида кошт. Пешыжак огеш кӱл гын, эмлымверыш да поликлиникыш ида кошт. Просталан шотлалтше тиде правил грипп дене черланыме деч начарын огыл арала.
  5. Прививке деч вара мушкылташ лиеш, но шекланенрак. Вакцинаций деч вара икымше кечылаште шокшо мончаш, ванныш ида пуро, бассейныште, пӱртӱсысӧ вӱдан верлаште ида йӱштыл. Чывылалтме шуэшак гын, душыш пурыза, но уколым ыштыме верым мочыла дене ида йыге.

М.ИВАНОВА.

Опубликовать в Одноклассники

Добавить комментарий