Волжский район Купсола (Эмеково) кыдалаш школын угыч чоҥымо зданийжым у тунемме ий вашеш таче-эрла сдатлышаш улыт манмым колмеке, чонна тушко савырныде ыш чыте. Чынжымак, ошын-йошкаргын волгалт шинчыше школ тора гычак шинчалан перныш.
Лишеммеке, зданий пелен ик вере да вес вере икмыняр пашазын ыштымыштым ужна, а кӧргыштӧ повар гыч тӱҥалын школын туныктышыжо-влак марте тыгыде пашам шуктеныт, чоҥымо деч вара кодшым эрыктеныт.
— Рушарнян школым приниматлаш толыт, сандене пытартыш тыгыде пашам тӧрлатылына, — мане «Марспецмонтаж» ОАО-н Волжскысо ПМК-жын тӱҥ инженерже О.Николаев. – Икымше сентябрь марте куд кече кодеш, сандене комиссий иктаж экшыкым муэш гын, мучаш марте тӧрлаташ жап кодеш. Тунемше-влак 1 сентябрьыште у классыш, у парт коклаш шинчышт манын, манмыла, лийдымыжымат ышташ тыршена.
Класс, моло пӧлем-влак, коридорат волгыдо, йоҥгыдо улыт, спортзал кугытшо да кӱкшытшӧ дене ӧрыктара. Тыгай школышто тунеммет кузе ок шу?
— Класслаш шындылаш оборудованийым кондымым вучена, таче-эрла толшаш, — мане мастер А.Тимофеев. – Кырча-марча ситыдымаш тунемше, туныктышо-влакын куаныштым ӱмылтышаш огыл. Прораб-влак Ш.Хабибуллин ден А.Матвееват тидымак ӱшандарен ойлышт.
Школлан проектым ыштыме гыч тӱҥалын (тудыжым 2008 ийыштак пеҥгыдемдыме) тачысе гай волгалтше зданий шочмешке вӱд ятыр йоген. Олег Александровичын мутшо почеш, негызым 2014 ийыште пыштыме, кум тылзе ыштымеке, тыште паша 2016 ий марте адакат шогалын. У ий гыч кермычым опташ тӱҥалыныт.
— Тачысе кечылан южо вере пырдыжым, кӧргыштӧ тошкалтышым чиялтыме, ошемдыме паша кодын. Эше школ йыр печым мучаш марте печен налаш да кудывечым ужарташ, шем мландым шупшыктен шараш кодын. Пытартыш пашажым пелыже утла ыштыме, эрла мучашлаш шонена. Оролымо сигнализацийлан кабельым шупшына,– рашемдыш О.Николаев.
Школыш пурымаште шола велым ужар кумдыкым ышташ мландым конден тӧрленыт, ты пашам пурла велне шуктеныт.
Ончысо проект почеш зданий 220 йочалан тунемаш келыштаралтын улмаш, но вара илыш вашталтышым пуртыктен: 120 икшыве тунемаш тӱҥалеш. Чылаже индеш класс лиеш.
Школын у зданийжым йырыр-йыр ончен савырныме гутлаште кудывечыш толын лекше тӱрлӧ ийготан ӱдыр-рвезе-влак шинчалан пернышт. Пеленышт туныктышо ыле. Икымше сентябрь кечым пайрем семын почаш ямдылалташ толыныт улмаш.
— Пытартыш кечылаште тыге погынен ямдылалтына. У школжым вет мыланнак чоҥеныт, сандене тудым почмо пайремжат чапле лийже манын шонена, — каласкала марий йылмым, ИКН-ым, музыкым туныктышо, тыгак организаторлан ыштыше Н.Иванова. – Тиде — чылалан пеш кугу куан. Содыки чапле школым вучен шуктышна.
— Пеш вученна тиде у школым, у класслаште, у партла коклаште тунемме шуэш. 1 сентябрь кечым чытен-чытыде вучена, каникулышто лийын шер темын. Канаш сай гынат, чон школыш шупшеш, — ӱчаш-ӱчаш ойлат рвезе ден ӱдыр-влак.
— Мый шкеже школым тачат эше ик гана ончен савырныде шым чыте. Жаплан келшыше, тунемше ден туныктышо-влакланат пеш келшен. Ик смене дене веле тунемаш тӱҥалына, — ешарыш Наталья Вячеславовна. – Тений икымше классыш 15 икшыве тунемаш толшаш, нунын ача-авашт деч тынар йодмаш пурен. Но шукырак лийыт манын шонена.
Теве тиде куан кече толын шуо. Теҥгече кажне гаяк тунемше, кидыш пеледышым налын, шкежат пеледыш гаяк тӱзланалын, волгалтше у школ омсалондемым вонченыт. Ме нунылан у тунемме ийыште чыла сайым да сай отметкым гына налаш тыланена. Шинчымаш кугорныш корныда пиалан лийже!
А.АНДРЕЕВ.
Снимкылаште:
Авторын фотожо.
