Лишыл жапыште ГТО-н шӧртньӧ знакшым Марий Элыште 1900 наре еҥ налшаш. Нуно нормативым 2017 ийыште шуктеныт.
Идалыкын икымше пелийыштыже республикыште «Готов к труду и обороне» всероссийский физкультур-спорт комплексын кеҥежымсе да телымсе фестивальлаштыже, республикысе финалыште куд тӱжем наре еҥ участвоватлен. Спорт министрын пашажым жаплан шуктышо И.Гребневын палемдымыж почеш, пел ийыште 1900 наре еҥ ГТО знакын озаже лийшаш.
– Нормативым шуктышо-шамыч ешаралтыт. Нунын ийготышт тӱрлӧ. Тидыже ӱшаным пуа, – палемден тудо. – Тиде тунемме ий гыч вузлаш тунемаш пурымо годым ГТО нормативым сдатлыме результатым ончат. Тидыже самырык тукымлан спорт дене пеҥгыде кылым кучымо шотышто шӱкалтыш семын лиеш. Но спорт мастарлыкым да качествым саемдымаште ГТО-м илышыш шыҥдарыме эше шагал. Ме посна системым ыштышаш улына. Мутлан, спортсмен-влакын школым пытарен вузыш тунемаш куснымекышт. Профилян огыл вузыштат спортсмен профессионал семынак шуаралтшаш, вияҥшаш. Тидын шотышто тудлан полшаш кӱлеш. Республикын чапшымат арален, тыгодым шонымо шинчымашымат налын кертше.
***
Таче кечылан республикыште ГТО-м сдатлыме шотышто тестым эрташ куд рӱдер уло: Йошкар-Олаште, Волжскышто, Козьмодемьянскыште, Медведево, Советский, Шернур посёлкылаште.
***
Республикыште олимпийский резервын лу спорт школжо уло. Спорт министерствын палемдымыж почеш, 35 вере спортсменым ямдылат. 2016 ийыште тыгайже 34 (тылеч посна олимпийский резерын 12 специализированный школжо, кызыт – 13), а 2015 ийыште 36 лийыныт.
Спортын базовый видышкыже куштылго атлетике, иймаш, спорт гимнастике, ече, футбол, бокс, спорт кучедалмаш, дзюдо, баскетбол, теннис, имне спорт, коньки спорт да сокыр-влакын спортышт пурат.
Е.Эшкинина.
