ТАЧЕ ЯЛЫШТЕ УВЕР ЙОГЫН

Верыш лектын каҥашыме

Ялозанлык да продовольствий министерстве Курыкмарий районышто кумдаҥдыме коллегийым эртарен.

Тушто отраслевой министерстве, федерал, республик кӱкшытан организаций, научно-шымлыше учреждений, «Поиск» агрофирме,  район администрацийын ялозанлык управлений, отдел, тӱшка ден фермер озанлык вуйлатыше ден специалист-влак лийыныт. Ялозанлык да продовольствий министр Ю.Сидыганов шурным поген налме, кокияшым ӱдымӧ дене кылдалтше эн ончыч шуктышаш паша нерген каласкален.

Тидым палемдыме: август мучашлан шурным 43 тӱжем гектар гыч поген налме. Тидыже пӱтынь кумдыкын 30 процентше лиеш. Кодшо ийын тиде жаплан 92 процентыште шийме. Идымлашке 92 тӱжем тонн угинде пурен. Гектарлан шотлымаште кокла лектыш – 21,3 центнер. Кодшо ийын тиде пагытлан 18,3 центнер лийын. Тыгай задачым шындыме: тений шурнывечыш вараш кодын лекме (шурно варарак шуын), сандене ты гана чаплын шочшо пырчым йомдарыде поген налшашлан ояр игечын кажне шагатшым пайдалын кучылтман.

Кургым ямдылыме тургым умбакыже шуйна. Тений чыла тӱрлӧ кормам  палемдыме деч шукырак ямдылыме. Мутлан, кукшо шудым палемдымын 110 процентшым шапашлыме, сенажым – 158, силосым – 108 процентшым. Кокияшым 32 процентыште ӱдымӧ.

Коллегийыште тӱҥалше фермер ден еш фермым почаш ойырымо грант нергенат кумдан мутланыме. Тыгай йӧн ялыште ешартыш паша верым почаш сай йӧным ыштен. Грант полшымо дене ушкал фермым почмо опыт дене фермер озанлык вуйлатыше И.Собко палдарен. Шӧр озанлыкыште вольык урлыкым саемдыме нерген РАН-ын академикше Ю.Иванов каласкален. Коллегийын участникше-влак пырчым эрыктен коштымо, пареҥгым да пакчасаскам аралыме опытым шымлаш «Мосолов лӱмеш племзавод» колхозыш, «Нива» ООО-шко, А.Бабушкинын фермер озанлыкышкыже миен коштыныт. Фермер П.Раевскийын пасуштыжо у сорт ковыштам онченыт да акленыт.

В.Смоленцев.

Опубликовать в Одноклассники

Добавить комментарий