ПАТЫРЛЫК

Огыт мондо

29 августышто Татарстан Республикын президентше Р.Минниханов Озаҥысе пычалтар заводышто пожар годым геройла колышо МЧС капитан Э.Илларионовын ешыжлан Мужество орденым кучыктен. Эдуардым шочмо кундемешыже, Волжский районеш, тойымо.

2017 ий 24 мартыште Озаҥысе пычалтар заводышто пожарым йӧртымӧ годым нелын сусырген. Тудын подразделенийже эн ончыч тулым йӧрташ толын. Капитан Илларионов вуйлатыше семын, шке пашаеҥже-влакым лўдыкшыдымӧ вереш коден, чот йўлышӧ ужашым тергаш каен. Тыгодым тудын лийме верыштыже пудештын. Э.Илларионов нелын сусырген,   эмлымверыш наҥгайыме годым корнышто колен.

Внутренний службын капитанже Эдуард Илларионов пожар ваштареш кучедалше кугыжаныш службышто 2001 ий 9 апрель гыч служитлен. Ты жапыште шкенжым сай профессионал семын ончыктен. Кугу пожарым йӧртымаште ик гана веле огыл лийын. Тидлан ведомствын да кугыжаныш награде дене палемдалтын.

Мутлан, 2013 ий 24 октябрьыште ты заводыштак лак дене чиялтыме цехым тул авалтен. Пожарым кӧргӧ гыч веле йӧрташ лийын. Тунам  чылажымат пеш писын ышташ кўлын. Вет тулын шарлымыже туткарыш шуктен кертын. Тунам капитан Илларионов йўлышӧ зданийыш пурен, шке задачыжым шуктен. «За отвагу» медаль дене палемдалтын. Тылеч посна тудо эше ятыр тўрлӧ медаль дене наградитлалтын. Тыгак «Булгария» теплоходын вўдыш пурен кайымыж деч вара (2011 ий) еҥым утарыме  пашаште тыршен.

СПСЧ-3 начальник, внутренний службын подполковникше С.Лаврентьевын палемдымыж почеш, Эдуард чот ответственный лийын. Кеч-могай заданийым уто мут деч посна шуктен. МЧС деч пачерым налшаш улмаш. Вет шкеже аваж дене Кугу Отечественный сар жапыште пленыш логалше немыч-шамычын чоҥымо баракыште илен.

– Ме тудым йӧратенна, пагаленна, – ойла С.Лаврентьев. – Пырля пашам ыштыше-влакым Марий Элыш поҥго погаш ўжын. Шуко поген гын, теле гоч пўтынь караулым поҥго дене сийлен.

Е.Эшкинина.

Опубликовать в Одноклассники

Добавить комментарий