19 августышто Чуваш Республикын рӱдолаштыже эрвел кучедалмаш дене «Чемпион-влакын кубокышт» тӱнямбал таҥасымаште землякна Полина Петухова шке тӱшкаштыже сеҥышыш лектын.
Марий ӱдыр (кикбоксинг дене тренерже С.Шабердин) Ульяновск гыч Российын да Европын чемпионжо Кристина Сандркинам ончылтен.
– Кучедалмаш нелыжак лийын огыл. Мый виянрак-влак денат кучедалынам. Ты ганат соперникем тале ыле, спорт мастер. Турнирыште мыйын ончылнем ик шонымаш лийын – сеҥаш. Кучедалме годым тренеремын йӱкшым веле колынам. Можыч, тыге тунемалтын ынде… Ончылно – Европын кубокшо. Тудо сентябрьыште Прагыште лиеш. Изиш каналтымек, ямдылалташ тӱҥалына. Тушто, чынжымак, тале кучедалмаш лийшаш, – палемден П.Петухова.
С.Шабердин спортын шкешотан видшылан кумылан йочам, тыгак кугурак ийготан-влакым секцийышкыже ӱжеш, посна группым чумыра. Лекше йодышым тыгай номеран телефон дене рашемден кертыда: 688989.
Снимкыште: тренерын ой-каҥашыже эреак кӱлешан да пайдале.