Общероссийский калык фронтын Марий Элысе «Социальный справедливость» пашаче группыж гыч эксперт-влак республикысе вич районышто ОНФ-н «Калыкын качествым аклымыже» проект почеш поликлиник-влакым тергымым иктешленыт. Каҥашымаште республикысе здравоохранений министерствын еҥже-влак, ола ден ялласе поликлиник-влакын тӱҥ врачышт лийыныт.
Тергыме паша дене эксперт-влак Медведево, Оршанке, Марий Турек, Килемар, Шернур районласе тӱҥ поликликылаште пӧлемла ден корпуслам ончен савырненыт, пациент-влак дене анкетированийым эртареныт. Нунышт поликлинике-влакын пашашт нерген увер ситышын улмо-укем, услугым пуымаште уто-ситым, персоналын поро кумылан улмыштым да шке пашам палымыштым, тыгак услугым пуымо качествым акленыт. Вич балл гыч кокла шот дене 3 гыч 4 марте акым пуэныт.
Еҥ-влак утларакше аҥысыр специальностян врач ситыдымылан, лабораторийлаш кужу черет улмылан, врач деке приемыш Интернет гоч возалташ лийдымылан вуйым шийыт. Марий Турек районысо пациент-влаклан коридорышто врач-шамычын кабинетлашт воктене пудыргышо мебельын мешаен кийымыже, Килемар районысо рӱдӧ больнице кудывечын тӱзатыдыме улмыжо да тушан асфальтым начарын шарыме келшен огыл. Чыла нине экшыкым кораҥдаш Марий Эл Минздрав деч йодмо.
Вашмут тыгай лийын: тергыме учрежденийлаште тӱжвак лукмо чыла гаяк экшыкым тӧрлымӧ. Шернур ЦРБ-ште, мутлан, врач-кардиологым пашаш налме, лишыл кечылаште эше кум врач-специалист: педиатр, участковый терапевт, анестезиолог-реаниматолог – пашаш лектеш. Марий Турек рӱдӧ эмлымверыште врач-невролог эмлаш тӱҥалын, сентябрь гыч самырык врач-акушер-гинеколог толеш. Поликлиникысе флюорографий кабинет воктене пудыргышо мебельым олмыктымо, йӧрдымыжым луктын кудалтыме.
Медведево поликлиникыште лабораторий кабинет воктене вӱрым пуаш толшо-влаклан вучаш йӧнлӧ лийже манын, черетым кокытлан шелме, а йоча поликлиникыште кадр йодыш кораҥдалтын, тушто сентябрь гыч шым педиатр участке ышташ тӱҥалеш. Оршанке ЦРБ-ште приемыш ынде электрон йӧн дене возалташ лиеш, а кудывечым талук жапыште тӱзатен шуктышаш улыт.
— Тыгай тергымашым моло районысо эмлымверыштат эртарыме лиеш. Тудым иктешлыме нерген увер narocenka.ru. интернет-ресурсышто вераҥдалтеш, — палемда республикысе «Социальный справедливость» пашаче группым вуйлатыше О.Цветкова. — ОНФ-н «Калыкын качествым аклымыже» проектше социальный сфере учреждений-влакын паша качествыштым чын аклымашке виктаралтын. Марий Элыште илыше-влак поликлиникын пашажым веле огыл, тыгак йочасад, школ, социальный обслуживаний учреждений-влакын пашаштлан акым пуэн кертыт.
А.АНДРЕЕВ.
