Политический репрессийыш логалше-влаклан пӧлеклалтше «Ойганыме пырдыж» мемориал ышталтеш.
Россий Президентын 2015 ий 30 октябрьыште лукмо пунчалже дене келшышын, тудо Москваште, Академик Сахаровын проспектше ден Садовый кольцо ушнымаште лийшаш. Проектын авторжо – скульптор Г.Франгулян. Тудым тений 30 октябрьыште почаш палемдыме.
Проект дене келшышын, мемориал йырысе кумдыкеш пӱртӱс кӱм шарат. Тудым политический репрессий дене кылдалтше тӱрлӧ регион: кушто еҥ-влакым тӱшкан лӱен пуштыныт, кушто лагерь-влак лийыныт, кушеч калыкым виеш поктен колтеныт — ты кундем гыч кондат . Монументым ыштыме пашам Политический репрессийын жертвыже-влакым шарныме шотышто кугыжаныш политикын концепцийжым илышыш пуртымо пашам ворандарыше межведомственный пашаче группо виктара. Тудо 2016 ий 15 февральыште ышталтын.
Монументым ышташ шийвундым кугыжаныш ойырен. Молыжым юридический ден физический лица-влакын пуымо надырышт дене чумырат. Тидыже мемораиаллан калык статусым пуышаш. Оксам «Увековечение памяти жертв политических репрессий» фонд пога. Тушко В.Лукин, С.Караганов, П.Лунгин, А.Рогинский, Н.Солженицына пурат.
С.Носова.
Пайрем кечын
«Одигитрия» Смоленский Юмо Авам чапландарыме кечын Волжский район Пӧтъялысе Свято-Гурьевский черкыште пайрем литургий да крестный ход эртеныт.
Шке жапыштыже лач тышке Казанский Богородицкий Седмиезерный пустынь гыч, тиде Юмо Аван юмоҥажым арален кодаш манын, шолып конденыт улмаш. Тоштыен-влакын ойлымышт почеш, тунамак Пӧтъял черке воктене памашшинча почылтын. Тиде вер кызыт марте калыкыште ик эн пагалыме да жаплыме лийын кодеш. Тушко тӱрлӧ вер гыч тушко кумалаш да памаш вӱд дене чывылталташ шонышо-влак толыт.
Пайрем литургийым Йошкар-Оласе да Марий архиепископ Иоанн эртарен. Тудлан лишыл приходласе настоятель-влак полшеныт. Епархий управлений пеленсе «Благовест» йоча хор службо годым марла да рушла мурен.
С.Носова.
Поянрак лийын
Кажне ийын Козьмодемьянскысе А.В.Григорьев лӱмеш художественно-исторический тоштер изобразительный искусствын тӱрлӧ жанрыштыже возымо у сӱрет-влак дене пойдаралтеш. Тений тудлан 60 наре пашам пӧлекленыт.
Тӱҥ шотышто Юл кундемысе сӱретче-влак тыгай поро пашалан кумылан лийыныт. Шочмо кундемысе пӱртӱсын, Юл эҥерын моторлыкыштым, историй дене кылдалтше оралте-влакым ончыктышо сӱрет-влак ятыр улыт. Тоштер пашаеҥ-влак Казань гыч сӱретче-влак А.Адиатуллиналан, С.Медведевалан, Нижний Новгород гыч В.Хазовлан, Йошкар-Ола гыч О.Ермиловалан поснак тауштат.
С.Носова.
