ТАЧЕ ЯЛЫШТЕ

Иканаште кок пайрем

Шуматкечын Волжский районысо Пӧтъял ялыште илыше-влак иканаште кок пайремым – Мӱй спасым да ял пайремым – палемдышт.

Кеҥежым ялыште паша лыҥак гынат, кастене верысе тӱвыра пӧрт ончыко калык ятыр чумырген ыле. Погынышо-влакым район, ял шотан илем администрацийла гыч еҥ, депутат-влакын, районысо централизоватлыме клуб системе вуйлатышын саламлыме мутым ойлымышт деч вара эн илалше еҥым, эн самырык ешым, августышто юбилейым да шочмо кечым палемдыше, шуко шочшан ешым, тений икымше классыш кайышаш ӱдыр-рвезе-влакым саламлышт да кажныжлан пӧлекым кучыктышт.

Чоныш пайркем кумылым пурташ Волжск ола, верысе ден пошкудо ял гыч толшо мурызо ден коллектив-влак, изи икшыве-влакын муралтымышт полшыш.

Ял пайремым тыште ты гана ятыр верысе семын калык деч оксам поген огыл, а кевыт оза, предприниматель-влакын полшымышт дене эртареныт. Шукынжо шийвундым пуэныт гын, икте, мутлан, кок кугу под плов ден шурпам шолтен конден, калыкым сийлен.

Л.Камалетдинова.

Опубликовать в Одноклассники

Добавить комментарий