Пашам кузе ыштымым, могай ситыдымаш улмым рашемдаш манын, ты гана Александр Евстифеев кушкыжмын эрдене эрак Йошкар-Оласе  йоча стоматологийыш вучыдымын миен савырнен – республик вуйлатышын пашажым шуктышо лӱмеш «Вияш линийыш» пурышо вуйшиймашын чын але уке улмыжым тыге шкежак тергаш лийын.  

Вуйшиймаште специалист деке оксам тӱлыде приемыш логалаш черет икмыняр тылзылан шуйналтме нерген ойлалтын. Талонлан, мутлан, таче миет гын, пӱй эмлыше врач деке 5-6 тылзе гыч веле логалат. Тыгодым ача-ава-влак теве молан эн чот ӧпкелалтыт: тиде специалист деке яра таче логалаш огеш лий, а оксам тӱлет гын, жапше вигак лектеш. Тидын чын улмыжым шкешотан экспериментым эртаренат тергеныт да вуйшиймаш пеҥгыдемдалтын.

Регистратурышто тиде тыге огыл манын умылтараш тыршеныт гынат, молан тыгай сӱрет палдырнымым республик вуйлатышын пашажым шуктышо йоча стоматологийын тӱҥ врачшын алмаштышыж дечат колын огыл. Тиде амал дене ты йоча учрежденийын пашам ыштымыж дене кылдалтше йодышым Марий Элын кучемже врач да республикын здравоохранений министерстве вуйлатыше-влак дене пырля каҥашаш палемден.

Л.Камалетдинова.