Марий Эл вуйлатышын пашажым шуктышо Александр Евстифеев республик дене палыме лийме шот дене кушкыжмын Юрино районыш миен. Тушто илыше-влак дене Шереметевын замокыштыжо вашлиймашым эртарен.
Вашлиймаш кок шагат наре шуйнен. А.Евстифеев 20 утла, тыгодымак «Вияш линийыш» пурышо йодыш-влакланат, вашештен.
Моло районлаште лийше вашлиймаш-влак дене таҥастарымаште, тиде мутланымаш поснак кугу шижмаш дене эртен. Тидыже социально-экономически вияҥме шотышто вес район-влак кокла гыч ик эн мучаште улмыж денат кылдалтын, очыни. Адакшым шагал калыкше, тыгодымак нуныжынат утларакше кугурак ийготан улмышт, бизнес паша шагал ышталтме, туризмым вияҥдаш йӧн укелык, молат куанаш амалым ок пу. Еҥ-влак изи пашадарым налмыштлан ӧпкелалт ойленыт. Проблемым кеч изишак кораҥдышашлан А.Евстифеев бизнесыште тыршыше ден верысе кучемлан район бюджет ончыкыжым мынярлан кугемеш, эн шагалже тунарланак пашадарым кугемдаш темлен.
Еҥ-влакым Юрино поселкышто да воктенсе илемлаште газым пуртыдымо йодыш тургыжландарен. Тудо республикысе правительствыште каҥашалтеш улмаш: Марий Эл, Киров да Нижегородский областьла «Газпромыш» регионласе тора районлашке газым пуртымо шотышто йодышым рашемдаш темлымаш дене лекташ ямдылалтыт. Но тудо темлымаш дене келшыже манын, верыште шкаланат чолгалыкым ончыктыман – илыме верлаште коммуникацийым калыкын да республикын оксаже кӱшеш ыштыман. Тидын дене пырля, районыш газым пуртымаш рентабельный лийже манын, у кугу предприятий-влакым пашаш колтыман.
Погынышо-влак кундемым тӱзатыме дене кылдалтше ятыр йодышым пуэныт. Нуно поселкысо уремлам кастене тул дене волгалтарыдымылан вуйым шийыныт. Тиде нелылыкым Евстифеев верысе кучемлан лишыл жапыштак кораҥдаш кӱштен. Тыгодымак шукыжо тыште илыше калыкын чулымлыкшымат онча манын палемден.
Еҥ-влак врач ситыдыме, эмлалташ торашке кошташ логалме нергенат ойленыт. Тыгак у моргым ышташ кӱлмӧ нерген йодышым нӧлталыныт. Районышто туризмым вияҥдышашлан Юриныште причалым чоҥаш кӱлмӧ нерген шонымашым каласеныт. Александр Евстифеев тидын дене келшен да йодыш рашемдалтеш, тыште причал лиеш, ойлен. Но таче але эрла огыл, а районышто моло кӱлешанрак йодышым рашемдыме деч вара тиде отрасльыш оксам пышташ йӧн лекмеке манын каласен.
Вашлиймаште могай йодыш йоҥген гын, иктат вашмут деч посна кодын огыл. Шукыжым Юриношко республик вуйлатышын пашажым шуктышо дене пырля мийыше министр-влак ончыкыжым рашемдаш тӱҥалыт.
— Тыште палемдыме йодыш-влак пӱтынь республиклан келшен толшо улыт – тиде корно, медицине, образований. Сайлан теве мом шотлем: еҥ-влак, манмыла, бытовой йодышым веле огыл пуышт, а тӱвыра дене кылдалтше нелылык-влак нергенат ойлышт. Мыйын шонымаште, рашемдаш лийдыме нелылык уке да нуным пырля рашемдыман, — вашлиймаш деч вара ойлен А.Евстифеев.
Л.Камалетдинова.
