УВЕР ЙОГЫН

    Шке сатум темлен моштыман. Лӱм денат

Республикыште «Марий продукт» брендым ямдылаш тӱҥалме паша икымше ошкылым ыштен. Тидлан марий кочкыш сатулан келшен толшо посна тамгам (единый знак) шонен лукташ пашаче группым чумырымо.

Республикыште марий тамгам ямдылыме опыт уке огыл. Мутлан, «Марий Эл Республикысе мӱкшызӧ-влакын обществышт» регионысо мер организаций Ялозанлык да продовольствий министерстве дене пырля марий мӱйын брендшым – «Марий отар» сату тамгам – регистрироватлен.

Кодшо кечылаште министерствыште агропромышленный комплексысе ты паша дене кылдалтше ведомство, организаций да предприятий-влакын еҥышт дене эртарыме совещанийыште «Марий продукт» единый брендым ямдылыме йодышым каҥашеныт. А келшен толшо тамган проектшым каҥашымаш йыргешке ӱстел йыр мутланымаш годым лиеш. Тудын темыже «Марий продукт» – Шкендым чын кочкыш дене сийле! Тидым кызытак ыште!» маналтеш. Тудо Йошкар-Олаште 23 августышто регион-влак кокласе «Йӧным мумо жап» инвестиций форум жапыште эрташ тӱҥалеш.

А.АНДРЕЕВ.

Палынак куштылемеш

Пенсий фондышто налме увер почеш, шоҥгыеҥ ден инвалид-влаклан компенсацийым тӱлымӧ паша палынак куштылемеш.

Россий пенсий фондын сайтысе личный кабинетыште йодмашым пуымо дене кылдалтше икмыняр сервисым пашаш колтымо. Нунын гоч пашадыме еҥын инвалид йочам, йоча годсек икымше группо инвалидым але пашам ыштен кертдыме еҥым ончаш келшымыже, компенсацийым тӱлаш ыштыме  нерген йодмашым налыт.

Пенсий фондышто ушештарат: электрон йӧн дене пуымо чыла тӱрлӧ услуго ден сервис фондын сайтыштыже ик порталыш  es.pfrf.ru. адрес дене ушалтыныт.  Нине услугым налшашлан кугыжаныш услугын единый порталыштыже регистрироватлалтман.

А.АНДРЕЕВ.

Опубликовать в Одноклассники

Добавить комментарий