Йошкар-Олаште верысе инициативым илышыш пуртымо дене кылдалтше эше ик проект шыҥдаралтын. Эшпай уремысе 156а ден 156б пӧртла кудывечым, уремыш лекме ужаш корным эскерыше видеокамер-влакым шындыме. Тидыже тыште илыше йоча, еҥ-шамычлан кошташ лӱдыкшыдымылыкым ышта. Тыгай пӧлекым ТОС нунылан кодшо ийыште верысе инициативе кӱшеш муниципал организаций-влакын кундемыштым вияҥдыме программыш логал кертмыжлан кӧра ыштен.
Ӱмаште нине пӧртлаште илыше-влак, йочаштын илышышт да тазалыкышт, тӱшка да шке погышт верч азапланен, видеоэскерыше системым шындаш кутырен келшеныт. ТОС председатель Р.Шишкин нунын темлымыштым рӱдолан администрацийышкыже шуктен. Проект конкурсым сайын эртен, тыге пеш кӱлешан шонымаш тӱшка вий дене илышыш пурталтын.
Палемдыман: проектым конкурсыш пуымо деч ончыч тудым ямдылымаште нине пӧртлаште илыше-влак шкештак чулымын тыршеныт. Нуно кудывечылан да тудын пелен кундемлан генпланым, сметный документацийым ышташ полшеныт. Чулым еҥ-влакын тыршымышт арам лийын огыл: субсидийым налыныт. Проектын чумыр акше 700 тӱжем наре теҥгеш шуын. Тышеч 500 тӱжем чолыжо республикысе бюджет гыч полыш семын лийын, молыжо — рӱдолан бюджетше гыч, тыгак поро кумылым ончыктымо полыш семын пурышо окса, калыкын шкенжын пыштыме надырже. Поро кумыл полыш семын пурышо окса изижак лийын огыл, молан манаш гын нине пӧртлаште лӱман да кӱкшӧ паша веран, кугу оксам налше-влак шукын илат.
Проектын ик ужашыжым – йоча площадке ден кудывече йыр печым печыме пашам – эше ӱмаштак шуктеныт. А кодшо кечылаште кудывечыште видеоэскерыше системе шындалтын. Камер-шамыч чумыр кудывечыште мо ышталтмым эскерат, чыла данный сервер пунктыш пура да аралалтеш.
Ынде еҥ-влак ласка чон дене илат. Ача-ава-влакат кудывечыште модшо икшывышт верч пешыже огыт тургыжлане. Ты кудывечыште тӱрлӧ ийготан йоча-влак шукынак улыт, вет воктенак 4-ше номеран гимназий верланен.
А.АНДРЕЕВ.
