Медведево район «Шойбулакский» племзавод республикыште шылым ыштен налше ик эн кугу озанлыклан шотлалтеш. Сандене сёснам да моло вольыкым ончаш фуражым, чоштыра ден нёрё кормам ятыр шапашлаш логалеш. Курал-ӱдымё мланде кумдыкшат изи огыл, пырчан да отызан культурым гына тений 14 тӱжем гектарыште ончен куштымо. Комбайн деч моло техникыже эше кормавечыште пашам шуят гын, пырчым шийше чыла агрегат, автомашина-влак уржа-сорлаш таче-эрла лекташ ямде шогат.
— Технике талук мучко сайын ыштыже манын, шыжымсе мланде пашам пытарымекак нуным у тургымлан юватылде ямдылаш тӱҥалына, — каласкала озанлыкын транспорт цех начальникше С.Калинин. — Кӱлеш шапаш ужашым тунамак налына, а лийшыжым шкенан токарный ден слесарный цехлаште пашазына-шамыч ямдылат. Мутлан, комбайн-влак кугу нагрузко дене ыштат, иктыжлан шотлымаште 750 гектарыште тӱредаш перна, кажне комбайнер кум тӱжем тонн деч шагал огыл пырчым шиеш. Тыгай нагрузкылан кёра техникын южо ужашыже пудырга, кугу давленийлан кёра шланг чӱчкыдын пудештеш. Сандене слесарный цехыште тургым жаплан ситышым ямдылаш логалеш. Токарный цехласе пашазе-влакат техникылан тачак кӱлеш ужашым уэмден-тёрленак шогат.
Кушкылым ончен куштышо цехын специалистше-влакат кормам шапашлыме дене пырля уржа-сорла пагытым чытен-чытыде вучат. Кече тёрланымылан кёра шыдаҥ пасу шинчаончылно манме гай ужарге гыч шышталге тӱсым нале.
— Кече тыгаяк сай шогаш тӱҥалеш гын, иктаж арнят пеле гыч чыла 20 комбайн пырчан да отызан культур пасуш ик кечыште лектыт. Кодшо ийыште сай игечыште шурнывечысе пашам 25 кечыште мучашлышна, — каласкала озанлыкын агрономжо С.Горохов. – Пытартыш вич ий почела шыдаҥым ик гектарлан шотлымаште 35 центнер деч шагал шиймаш уке. Тений 35 тӱжем тонным налаш шонена. Пырчым аралаш пышташ кум кугу элеваторна уло.
Мутат уке, тынар кугу кумдыкеш пырчан культурым ончен куштымо паша тыршымым йодеш. Растениеводство цехын специалистше-влак шошымсо нур паша гыч тӱҥалын шурным поген налме марте лым огыт лий.
— Шурным погымо пашалан тӱҥалтыш шошым, пырчым ӱдымё пагытыште, ышталтеш. Растениеводство цехлан тӱҥ тургым толеш, — палдара племзавод директор Н.Чунихина. – Тений ночко игечылан кёра шӱкшудо пырчан культур озым деч ончыч нёлталте, сандене тудын ваштареш, тыгак тӱрлё чер ваштареш нигунамсе деч чот кучедалаш логале. Ты цехын, тыгак механизаций цехын пашаеҥже ден специалистше-влаклан паша лектышыштым ончен премийым тӱлымё положений озанлыкыштына ынде лу ий утла кугу пайдам пуа. Планыште палемдыме шурно лектышым налыт гын, нунылан сай премийым тӱлена. А ты лектышым эртыме годым посна системе почеш кумылаҥдена. Сандене нине цехыште тыршыше пашаеҥ ден специалист-влак чапле мучаш результат верч ик еҥ семын шогат.
Пашам сайын ышташ кумылаҥдыме вес пайдале йён – авансироватлымаш. Тургым жапыште диспетчер гыч тӱҥалын директор марте тылзе еда премийым тӱлымым чарнат. Но уржа-сорла пашам иктешлымеке, шурным планыште палемдыме кугытым але утларакат налыныт гын, тӱлыдымё премий чыла инженерно-технический пашаеҥлан тӱрыс пёртылталтеш. А механизаций ден кушкылым ончен куштышо цехласе пашаеҥ-влак прогрессивный манме системе почеш кок пашадар кугытан але утларакат премийым налыт. Тылзаш пашадарым кокла шот дене 40 тӱжем теҥгем шотлаш гын, мыняр лекмым умылаш неле огыл.
— Калыкым пашалан кумылаҥдыме тыгай системым шыҥдарымылан нимыняр ёкынен огынал, — иктешла Н.Чунихина. – Тудо пашаеҥ-влакым икояныш савыра. Иктаж-кушто иктаж йыжыҥ жаплан окшакла гын: але механик гайкым мучаш марте пӱтыралын огыл але агроном титакым ыштен – экшыкым ыштышым огыт кычал, чылан ик семын мутым кучат. Калыкна команде йён дене ышташ тунемын. Тидыже тенийсе начар игечан идалыкыште поснак шижалте. Тӱшкан, ик цельыш шуаш шонен ыштен, нелылыкым куштылган чактараш лиеш.
Анатолий АНДРЕЕВ.
Снимкылаште: озанлыкын комбайнерже-влак А.Лебедев ден Э.Кудрявцев; (сми004) слесарь Э.Попов; (сим007) токарь Б.Домрачев. (сим029)
М.Скобелевын фотожо.
