Марий Элын агропромышленный комплексшым вияҥдымаште верысе власть тачысе кечылан ончыл верыш мелиорацийым, кормам ямдылыме пашам да уржа-сорлам шында. Тений икымше гана республикна «Мландым вӱдыжтарымашым вияҥдымаш» федеральный целевой программыш пураш йодмашым пуэн.
Марий Элын Ялозанлык ден продовольствий министерствыжын данныйже почеш, 2018 ийлан гидромелиоративный пашам илышыш пурташ 14 миллион чоло теҥгем кучылташ палемдалтеш. Ты окса гыч утларак ужашыже федеральный бюджет гыч пура.
Ты программын тӱҥ шонымашыже – ялозанлыкым умбакыже вияҥдаш пеҥгыде негызым ышташ, кукшо игечылан да вӱд ташлымылан кӧра лийын кертше эҥгекым иземдаш, тыгак мландын шочыктен кертме вийжым кугемдымылан кӧра кушкылым ончен куштымо да вольыкым ашныме паша кугытым палынак ешараш.
Вӱдыжгӧ игече чоштыра ден нӧрӧ кормам ямдылымаште кугу чаракым ышта гынат, ты паша шогалын огыл, чыла озанлык уржа-сорлаш лекташ ямде. Мутлан, силосым оптымаште озанлык-шамыч ӱмашсе тыгаяк жапысе кӱкшытыш шуыныт, тачысе кечылан 70 наре процент силосым шапашлыме.
А.АНДРЕЕВ.
