Йошкар-Оласе Крылов уремыште калык ондаксе семынак пычкемыште ила. * Тулволгыдым пуртен кертдымым мэрийыште бюджетыште окса укелык дене умылтарат. * Тугеже бюджетше молан ышталтеш?
Ты кундемыште илыше-влакын уремлан лўмым пуымо жап гычак тул деч посна йӧсланымыштым администрацийыште сайын палат. Нунын прокуратурыш вуйым шиймышт почеш правам аралыше орган экшыкым кораҥдаш представленийымат ыштен, но урем таче мартеат волгалтын огыл.
А вет ты участке изи огыл: Строитель урем гыч тўҥалын Кугу Чигаш марте Аленкино велыш шуйна. Маска лукат манаш ок лий, тиде — рўдолан шуко еҥан илыме кундемже. Тыште икмыняр предприятий, кочмывер, автозаправке, пӧрт, гараж верланеныт. Кечывал волгыдышто чылажат сай, но кас толмеке кундемым шинчам шуралтен койдымо пычкемыш авалта. Еҥ-влаклан корным йолшўм дене кычал ошкылашышт перна.
Автомашина дене кудалыштше-шамычлан куштылгырак, нуно корным технике тул дене волгалтарат. А йолешке-шамычлан ятыр пачаш тўткӧ лийман, поснак луман пагытыште. Тротуарым лум петыра, тудым иктат ок эрыкте.
— Кумло ий ончыч Крылов уремысе баракыште еш дене иленна. Эше волгыдыштак йочам шкетыштым уремыш лукташ лўдына ыле, — каласкала ончычсо строитель, кызыт пенсионер В.Смоленцев. – Йӧра, кеч ола покшелне пачерым налын, ты пычкемыш лук гыч утлышна. А уремыште сўрет ончычсо гаяк.
Рўдолан администрацийыштыже ойлат: Крылов уремеш понар-влакым ышташ да тулволгыдым пурташ проектно-сметный документацийым ямдылыман. Ты роскотлан бюджет гыч шагал огыл окса кўлеш. Тугеже олан бюджетше молан ышталтын? Налоглан погымо оксаже кушко кая? Бюджетыш пурышо шийвундыжо коммунальный проблемым кораҥдаш, саде понарлык меҥгым шогалташ да тулволгыдым пурташ кайышаш огыл мо? Нине йодышлан веле огыл, молыланат вашештыме олмеш пуйто умшаш вўдым подылыныт.
А.АНДРЕЕВ.
