УВЕР ЙОГЫН

У судья-влакым пеҥгыдемдышт, оксам шеледышт

27 июльышто Марий Эл Республикын кудымшо созыв Кугыжаныш Погынжын 28-ше сессийже эртыш.

Тушко Марий Эл вуйлатышын пашажым шуктышо Александр Евстифеев толын ыле.

Сессийыште чылаже 17 йодышым ончышт. Икымшыже Марий Эл Республикын ончычсо тӱҥ федеральный инспекторжо Валериан Егоровым республикын  Конституционный судшын судьяжлан шогалтыме дене кылдалтын ыле. Тудым тиде должностьыш шогалташ темлымым поддержатлаш йодмыж годым А.Евстифеев тыге палемдыш:

— Валериан Александрович Егоров – кӱшыл степенян квалифицированный юрист, республикын патриотшо. Тиде званийым тудо профессиональный пашаже да коллегыже, республикыште илыше-влак дене кылже дене сулен да пеҥгыдемден.

Тудын нерген республикысе правительствын министрже — республик вуйлатышын полномочный представительже Сергей Трухинат ойлыш. Тылеч вара тайно йӱклымашым эртарышашлан счетный комиссийым палемдышт да пеҥгыдемдышт. Тыгак Советский районысо 37-ше номеран судебный участкын мировой судьяжым лу ийлан палемдыме йодышым ончышт да тиде должностьыш Сергей Юрьевич Петровым пенгыдемдышт.

Умбакыже угыч Валериан Егоровын кадидатурыж деке пӧртыльыч. Тудын верч тайно йӱклаш 20 минут жапым ойырышт. Палемдыме жап эртымеке, счетный комиссий палдарыш: Валериан Александрович Егоровым Марий Эл Республикын  Конституционный судшын судьяжлан шогалтышаш верч сессийыште ты кечын лийше 39 депутат гыч  38  еҥже шке йӱкшым пуэн, икте ваштареш лийын. У судьялан тудым шогалтыме нерген каласымеке, Валериан Егоров чылашт ончылно присягым приниматлыш.

Умбакыже Марий Эл Республикын бюджетше, тудын дене кылдалтше да икмыняр законыш, законодательный актыш вашталтышым пуртымо йодыш-влакым каҥашышт. 2017 ийлан да 2018 ден 2019 плановый пагытлан республикын бюджетышкыже депутат-влак вашталтышым пуртеныт: 25494398,5 тӱжем  теҥге парыш пурышаш, роскотын тӱрыс кугытшо 25610745,2 тӱжем теҥге, бюджет дефицит 116346,7 тӱжем теҥге лийшаш манын палемдышт. Налог да налог огыл доход ешаралтме да федеральный бюджет гыч окса пурымо дене бюджет сферыште пашам ыштыше-влаклан пашадарым кугемдаш, социальный выплатым ышташ, верысе инициативе-влаклан полшаш, ялозанлыклан кугыжаныш велым полышым пуаш, икмыняр молылан окса роскот кугемеш манын палемдышт. 28-ше сессийын паша радамже дене келшышын,  Марий Эл Республикын чылаже 14 законжым да Кугыжаныш Погынын 21 пунчалжым приниматленыт.

ЛюбовьКамалетдинова.

Опубликовать в Одноклассники

Добавить комментарий