Шукерте огыл Советский районысо Шабашан памаш воктенысе Казанский Юмо Аван черкыже пелен ийготыш шудымо икшыве-влаклан кеҥежымсе лагерь эртен.
Тудын деч ончыч игече ночко шоген, сандене 20 утла ӱдыр-рвезылан тушко кок километр наре лавыран корным нӧштыл пурашышт логалын, молан манаш гын часамла да кок пачашан пӧрт, кушто нунылан илаш верым келыштарыме лийын, кугорно деч ӧрдыжтӧ вераҥыныт. Но варажым арня наре сай игече шоген, тидыже йоча-влакын кумылыштым чотак нӧлталын. Телевизор, телефон деч посна, шнуй верыште икшыве-влак кугыеҥ-влак дене пырля жапым пайдалын эртареныт: тул ӱмбалне кочкаш шолтеныт, изирак-влаклан полшеныт, пырля модыныт, илышлан тунемыныт манаш лиеш.
Кажне кечын нуным оҥай программе вучен. А тудыжо нунылан икте-весе деке лишкырак палыме лияш йӧным ыштен. Пырля модыныт, кладым кычалыныт, тӧрсыран полосам эртеныт, чодыраш емыжлан коштыныт… Нунын деке унала верысе Ӧрша да Акашево черке приход-влаклан вуйын шогышо настоятель-влак миеныт, пайдале мутланымашым эртареныт. Лагерьын ик участницыжын шочмо кечыжымат пеш веселан эртареныт. Православный святой-влак Петр ден Павлын кечыжлан храмыште эртыше пайрем службышто лийыныт. Пу гыч фигурко-влакым пӱчкедаш туныктышо мастар Екатерина Полушина толын каен. Икшыве-влак у пашалан кумылын тунемыныт.
Ты жаплыме верын памаш вӱдешыжат йоча-влак кажне кечын гаяк чывылталт лектыныт. Вӱдшӧ йӱштырак лийын гынат, иктат черланен огыл. А кас еда тулото воктене программе чылаштым чумырен. Шабашан памаш воктенысе лагерь икшыве-влаклан моткоч келшен.
С.Носова.
Снимкылаште: лагерьыште йокрокланаш жап лийын огыл.
А.Митюкован фотожо.
